Prezidente RTTL,e.p, José António Belo no Sekretáriu Jerál Parlamentu Nasionál, Adelino Afonso de Jesus, asina memorandu entendementu iha sala konferénsia Parlamentu Nasionál, kuarta (16/06). Imajen/Mídia PN.

DILI, 16 maiu 2021 (TATOLI)—Rádiu no Televizaun Timor-Leste (RTTL e,p) lideradu José António Belo, apoia rádiu Parlamentu Nasionál hodi transmite atividade parlamentár ba públiku tanba durante ne’e frekuénsia hosi rádiu uma fukun la kobre fatin hotu-hotu.

Kooperasaun institusionál ne’e liuhosi serimónia asinatura memorandu entendimentu entre Prezidente RTTL,e.p, José António Belo no Sekretáriu Jerál Parlamentu Nasionál, Adelino Afonso de Jesus, iha sala konferénsia Parlamentu Nasionál, kuarta ne’e.

Sekretáriu Jerál Parlamentu Nasionál, Adelino Afonso de Jesus, hateten asinatura mememorandu entendimentu entre Parlamentu Nasionál ho Rádiu Televizaun Timor-Leste (RTTL) ne’e hodi hadi’a di’ak liután kondisaun transmiaun no alkansa frekuénsia rádiu Parlamentu Nasionál nian.

“Rádiu parlamentu nia persentajen kiik tebes, entaun finalidade hosi asinatura memorandu entendimentu liuhosi RTTL,e.p utiliza fasilidade sira no aluga satellite RTTL nune’e alkansa frekuénsia ne’e bele luan liután, hanesan mós bele alkansa mínimu 70% iha territóriu nasionál,” Adelino Afonso de Jesus hateten.

Kooperasaun ne’e ho durasaun tinan-rua no iha posibilidade sei kontinua estende maibé depende ba evolusaun.

“Kooperasaun intermu tékniku nian kontinua nafatin tanba labele ramata de’it ho ida-ne’e. Ezemplu, rádiu PN ninia kapasidade alkansa kobertura ba to’o territóriu nasionál. Kooperasaun ne’e mós uza kanál RTTL nian ho diretamente hodi transmite programa atividade parlamentár nia ba públiku,” nia dehan.

Iha fatin hanesan, Prezidente RTTL,e.p, José António Belo, apresia ho kooperasaun ne’ebé inisia hosi Parlamentu Nasionál hodi divulga programa tomak parlamentu nian ba iha baze.

“Liuliu ba aluga satellite ho frekuénsia RTTL nian atubele ajuda rádiu parlamentu nia transmisaun bele to’o iha munisípiu sira. Iha kontratu, tanba ne’e mak ohin asina ne’e. Ne’e nu’udar kooperasaun ida tanba Parlamentu Nasionál hanesan órgaun Estadu nian, agora RTTL ne’e instituisaun Estadu nian ida, ne’ebé kontribui ba iha Parlamentu Nasionál,” nia dehan.

Akordu kooperasaun ne’e sei hahú iha tinan ida-ne’e nia laran, maibé posibilidade sei estende tanba kooperasaun entre instituisaun Estadu nian.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here