Majór Jenerál, Falur Rate Laek, Imajen/Media F-FDTL.

DILI, 16 juñu 2021 (TATOLI)—Vise Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál, Falur Rate Laek, hateten rezultadu teste fíziku ba membru F-FDTL foun sei anunsia iha tempu badak.

Notísia Relevante: Lere Anan Timur relata rekrutamentu F-FDTL ba PR

“Rekrutamentu F-FDTL nian ne’e na’in hira mak esklui ka pasa iha teste fíziku ne’e, hein de’it, tempu badak sei anunsia nia rezultadu ba públiku,” Majór Jenerál, Falur Rate Laek hateten ba jornalista sira hafoin halo enkontru ho Prezidente Repúblika, Francisco Guterres Lú-Olo, iha Palásiu Prezidensiál Nicolau Lobato, Bairru Pite, Dili, kuarta ne’e.

Nia hatutan, tanba rekrutamentu ba membru forsa armada ne’e liuhosi rekezitu sira hanesan selesaun dokumentu, livre hosi COVID-19, teste matan no tilun, halo ezersísiu, teste eskrita no fíziku, hafoin valór to’o mak deside sé mak pasa no sé mak la pasa.

“Iha momentu ida agora ne’e, ami foku liu ba situasaun espesífiku ne’ebé halo rekrutamentu foun ba selesaun no rekrutamentu ba memebru F-FDTL foun ba teste fíziku iha Metinaro no nia prosesu tomak hodi hato’o ba Prezidente Republika,” nia dehan.

Aleinde ne’e, Falur Rate Laek hateten situasaun jerál oras ne’e di’ak hela tanba laiha funu no funu boot ne’ebé mak oras ne’e mundu hasoru mak COVID-19. Maibé, iha Timor-Leste, númeru COVID-19 ne’e menus ona tanba ema barak mak simu vasina no kumpre medida prevensaun hosi OMS no MS.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here