Diretór Dirasaun Rejionál Rejistu Sivil Notariadu RAEOA, José Ase Neno Colo. Imajen Tatoli/Abilio Elo Nini.

OÉ-CUSSE, 16 juñu 2021 (TATOLI)—Ministériu Justisa liuhosi servisu Dirasaun Rejionál Rejistu Sivil Notariadu Konservatória Rejiaun Administrativa Espesiál Oé-Cusse Ambeno (RAEOA) hosi janeiru to’o juñu 2021 kontribui reseita $9.350 hosi fonte pasaporte eletróniku 

Notísia Relevante: Governu Desentraliza Ona Pasaporte Eletróniku

“Hosi inísiu janeiru to’o juñu agora ne’e, ita kobre ona taxa ba Estadu liuhosi pasaporte eletróniku hamutuk $9.350,” Diretór Dirasaun Rejionál Rejistu Sivil Notariadu RAEOA, José Ase Neno Colo, informa ba Agência TATOLI, iha nia servisu fatin, Santa Rosa, kuarta ne’e

Hosi montante ne’e, nia dehan, totál ema hamutuk na’in-137 mak asesu ona ba pasaporte eletrónika.

Tuir nia, tipu ba atendimentu depende ba ema-nia hakarak tanba tuir lei hateten katak pasaporte ema selu oin tolu (3) mak selu $50 durasaun tempu loron 10 mak foti, selu $75 durasaun ne’e loron tolu (3) mak foti no selu $100 ne’e iha oras 24 nia laran bele foti kedas

“Durante ne’e, hosi ema na’in-137 ne’e iha ema na’in-41 mak hasai pasaporte eletróniku ho durasaun normál ho osan $50, na’in-92 mak hasai pasaporte selu $75 no na’in-haat (4) mak selu pasaporte ho $100 ba loron ida foti kedas ne’e,” nia dehan.

Durante estadu emerjensia nia laran ne’e, Dirasaun Rejionál Rejistu Sívil Notariadu Konservatória Oé-Cusse halo nafatin atendimentu ba públiku liu-liu halo pasaporte, sertidaun moris no sertidaun óbitu ho dokumentu seluk ne’e la’o normál nafatin.

“Durante ne’e, ita halo emisaun ba sertidaun moris no óbitu, srtidaun kazamentu nian ba komunidade inklui halo prosesu emite Billete Identidade (BI) ne’e, ita emite ona sertidaun moris ba ema 862, sertidaun óbitu 41, sertidaun kazamentu ba ema 29 no halo emisaun billete identidade ba komunidade no estudante hamutuk 2.108,” nia dehan.

Jornalista: Abilio Elo Nini

Editór: Cancio Ximenes

HAKEREK NO HATÁN

Please enter your comment!
Please enter your name here