Ministru Koordenadór Asuntu Ekonómiku, Joaquim Amaral. Imajen TATOLI/Egas Cristóvão

DILI, 16 juñu 2021 (TATOLI)Ministru Koodenadór Asuntu Ekonómiku (MKAE), Joaquim Amarál, konsidera Timor-Leste nia partisipasaun iha Expo Dubai bele fó efeitu multipikadór, ne’ebé sei akontese iha setór turizmu, petróleu no minerál, agrikultura, sosiál no ekonómiku.

“Ita labele haree de’it benefísiu finanseira tanba iha mós benefísiu sosiál, ekonómiku no seluk tan. Tanba ita-nia partisipasaun oferese oportunidade ba setór privadu sira bele expande sira-nia konvivénsia no konesaun, nune’e vizitante bele koñese produtu lokál, tanba eventu mundiál ne’e partisipa hosi nasaun Europa, Médiu Oriente no Áfrika,”  Ministru Joaquim, hateten iha resintu Ministériu Finansa, Aitarak-Laran, Dili, kuarta ne’e.

Espozisaun mundiál ne’e sei realiza iha loron 01 outubru 2021 to’o 31 marsu 2022 no sei partisipa hosi nasaun 196.

Notísia relevante: Orsamentu partisipasaun Timor-Leste ba Expo Dubai 70% hosi apoia externa

Orsamentu ba atividade preperasaun Timor-Leste iha Expo Dubai hosi orsamentu 2021, ho totál millaun $1 resin (30%) no apoiu hosi Estadu Uni Emirat Árabe hamutuk millaun $2 resin, ne’ebé ekivalente 70%.

Nune’e mós, partisipasaun país iha eventu ne’e importante atu hatuur prezensa hanesan Estadu.

“Ha’u hanoin hanesan parte ida hosi investimentu, tanba bainhira ko’alia investimentu ema hanoin ita tau osan no mai ho osan, maibé iha investimentu sosiál seluk ne’ebé nia retornu ne’e ita bele hatene iha tempu ida,” nia akresenta.

Nune’e, Ministru husu ba sidadaun hotu atubele apoia partisipasaun Timor-Leste ba Expo Dubai, tanba hanesan programa ida ne’ebé entidade relevante sira halo diskusaun naruk, desde tinan 2018 no aprovadu ona liuhosi Orsamentu Jerál Estadu (OJE).

Timor-Leste mós hetan ajuda hosi uma-na’in Estadu Uni Emirat Árabe, atu halo diskontu ba verba balun, hanesan container no tula produtu inklui fó paviliaun gratuitu.

“Ita haree ba tempu naruk oituan, ne’ebé ita bele aproveita didi’ak ninia vantajen atubele projeta vizibilidade Estadu no potensialidade sira ne’ebé ita iha, tanba se la’e ita ko’alia turizmu, produtu kafé no seluk tan maibé ita la book-an, nasaun seluk mós iha, ita bele lakon kompetetivu,” nia hatutan.

Notísia relevante: Juventude FRETILIN husu Governu esplika Timor-Leste partisipa iha Expo Dubai

Tanba ne’e, governante ne’e husu atu públiku labele pesimista ho partisipasaun Timor-Leste iha eventu mundiál ne’e.

“Ita tenke haree Expo Dubai ho esperansa boot ida katak, maski iha difikuldade maibé  iha oportunidade atu hatudu buat ruma ne’ebé ita iha. Ha’u hanoin katak Timor-Leste nia partisipasaun mós bele fó vantajen hodi ema bele koñese liután potensialidade rekursu petróleu, minerál no produtu kafé no baunila no seluk,” nia subliña.

Timor-Leste kontinua partisipasaun iha Expo Dubai

Iha fatin ketak, Ministru Turizmu, Komérsiu no Indústria (MTKI) no Sekretáriu Jerál Expo Dubai, José Lucas do Carmo da Silva, hateten, Governu nia posizaun klaru hodi kontinua partisipasaun Timor-Leste iha Expo Dubai tanba programadu no aprova ona.

“Krítika sira Governu rona no konsidera atu hadi’a, maibé programa ne’ebé programadu ne’e tenke la’o nafatin, hanesan ita-nia Primeiru Ministru dehan ona, ne’ebé ita partisipa nafatin Expo Dubai ne’e” nia afirma.

Notísia relevante: PM defende partisipasaun iha Expo Dubai tanba investe tempu-rekursu

Tanba ne’e, daudaun ekipa ne’ebé envolve iha preparasaun Expo Dubai halo hela preparasaun.

“Ita prepara didi’ak pakote ne’ebé atu lori bá, ne’ebé iha ona container laran no prepara ekipa sira ne’ebé atu bá serbisu lori produtu Timór iha eventu ida-ne’e,” nia hatutan.

Timor-Leste sei lori produtu hamutuk 50 resin hodi aprezenta iha espozisaun no komersializa produtu hamutuk 100 resin, kompostu hosi produtu agríkola, artezanatu, minerál no produtu tais.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here