Membru PNTL hala’o patullamentu tama-sai bairru iha Dili, hodi asegura komunidade iha situasaun serka sanitária, kuarta (12/05/21). Imajen Tatoli/António Gonçalves.

DILI, 16 juñu 2021 (TATOLI)— Sekretáriu Estadu Protesaun Sivíl (SEPS) liu hosi Diresaun Nasionál Prevensaun Konflitu Komunitária (DNPKK), iha estratejia tolu hodi halo prevensaun ba konflitu iha komunidade.

Estratejia tolu ne’e mak hanesan primeiru, mekanizmu prevensaun problema labele mosu, segundu bainhira problema mosu duni karik oinsa buka solusaun nune’e problema labele sai bo’ot no terseiru problema sai bo’ot ona karik, buka oinsa rezolve atu lalika akontese fila-fali.

Notísia relevante:MI lansa programa alerta ba prevensaun konflitu iha suku

“DNPKK iha medidór iha munisípiu hotu-hotu ne’ebé ho papél atu hala’o diálogu no aprosima komunidade hodi rezolve bainhira konflitu ruma mosu iha komunidade, nune’e bele kontribui harii paz no estabilidade,” Diretór Nasionál DNPKK, António Viegas, hateten ba jornalista Agência Tatoli, iha edifísiu Ministéiru Interiór Dili, kuarta ne’e.

Prosesu mediasaun, mediadór fasilita atu rezolve problema ka  disputa ruma, no mediadór sei la impoin buat ruma to’o hetan solusaun tuir akordu hosi parte rua.

“Atividade-sira barak maki ta hala’o mediasaun ba problema sira entre joven hanesan arte marsiál, disputa rai to’o ikus dame-malu no redúz krime,’’ nia subliña.

António Viegas, la esplika detalla kona-bá  kazu hira mak hala’o mediasaun iha inísiu fulan janeiru mai to’o agora, tanba la lembra númeru, maibé iha kazu lubuk mak diresaun ne’e atende, no daudaun iha pedidu hosi komunidade munisípiu Ermera, Bobonaro, Covalima, Manatuto no sira-seluk, husu diresaun atu fasilita diálogu ka mediasaun ba problema.

Tanba ne’e, DNPKK kontinua realiza diálogu, identifika probema ne’ebé mosu, buka hatene kauza no halo mediasaun.

Inundasaun ne’ebé akontese iha 04 baríl, komunidade barak refuzia iha fatin akollamentu no balun hanoin barak to’o hamosu problema psikolojia tanba uma hetan estragu, nune’e DNPKK mós halo diálogu ho família, bainhira re-integra fila-fali ba idaidak nia-uma.

Iha atividade DNPKK durante ne’e, sempre serbisu hamutuk hodi kolobora ho autoridade lokál, polísia komunitária, lia-na’in no parte relevante-sira.

DNPKK sei realiza jornada ba páz

DNPKK mós planeia ona atu realiza jornada ba páz, ho tipu la’o ain hamutuk ne’ebé sei envolve grupu arte-marsiál hotu-hotu iha Timor-Leste (TL), bainhira númeru COVID-19 reduzidu no termina serka sanitária.

Tuir planu atividade ne’e sei konvida mós líder nasionál sira hanesan eis Prezidente Repúblika, José Ramos Horta no Bispu-sira hodi ko’alia kona-bá tema importante ba hametin unidade joventude ne’ebé envolve iha arte-marsiál.

António Viegas  hateten, durante ne’e DNKKP  iha komunikasaun di’ak ho lider arte-marsiál, tanba ne’e sei konvida hodi tuur hamutuk atu diskute planu ne’e.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here