Foinsa'e Covalima dansa kultura Simu bainaka sira. Foto TATOLI: Rafy Belo

DILI, 16 juñu 2021 (TATOLI)—Sekretáriu Estadu Arte no Kultura (SEAK) liuhosi Dirasaun Nasionál Promosaun Arte no Kultura, liuhosi fundu transferénsia públika sei fó apoiu ba grupu kulturál tradisionál, grupu kulturál kontemporanea no grupu kulturál indústria kriativa iha Timor-Leste.

Notísia Relevante: OJE 2021, SEAK ezekuta ona 23,3%

Diretór Nasionál Promosaun Arte no Kultura, Felix Ximenes, hateten orsamentu tranferênsia públika ne’e fahe ba rua mak rihun $375 ba grupu kulturál tradisionál no rihun $40 ba grupu kulturál kontemporanea no  indústria kreativa sira, ho orsamentu rihun $40 ba grupu kulturál sira iha munisípiu 12 inklui Autoridade Rejiaun Espesiál Oé-Cusse Ambeno (RAEOA).

“Ami konsege tun ba munisípiu sira-ne’ebé sai alvu ba fundu transferênsia públika ne’ebé atu fó apoiu ba grupu kulturál tradisionál, grupu kulturál kontemporania no grupu kulturál indústria industria kriativa, ne’ebé iha planu atu fó apoia iha tinan 2021 ne’e. Ba grupu soru tais másimu $2500 no ba grupu dansa, múzika, homan, halo sana rai, estátua ne’e másimu $1500 no mínimu $100,” nia dehan.

Orsamentu ne’ebé fó apoiu grupu benefisiáriu sira-ne’e, atu motiva grupu sira bele hakbiit sira-nia grupu, kria kampu servisu ba sira-nia aan nomós ba sosiedade, hakbiit ekonomia iha família no promove di’ak liután sira-nia grupu.

“Ezemplu, ba grupu múzika, oinsá sira bele hakle’an liután sira-nia grupu. Ba grupu dansa, oinsá atu promove ita-nia dansa orijen sira-ne’ebé iha, mezmu ho mistura, maibé fó apoiu ba sira oinsá atu dezenvolve no haburas nafatin ita-nia kultura,” Felix Ximenes, hateten ba Agência Tatoli, iha nia knaar fatin, Avenida Portugal, Díli, foin lalais ne’’e. 

Apoiu ba benefisiáriu hirak ne’e ho objetivu atu motiva grupu sira bele hakbiit sira-nia grupu, kria kampu servisu ba sira-nia aan nomós ba sosiedade, hakbiit ekonomia iha família no promove di’ak liután sira-nia grupu.

“Ezemplu, ba grupu múzika, oinsá sira bele hakle’an liután sira-nia grupu. Ba grupu dansa, oinsá atu promove ita-nia dansa orijen sira-ne’ebé iha, mezmu ho mistura, maibé fó apoiu ba sira oinsá atu dezenvolve no haburas nafatin ita-nia kultura,” nia hateten.

Iha situasaun pandemia COVID-19 ne’e, SEAK konsege tun ba munisípiu hitu ne’ebé sai alvu ba fundu transferênsia públika hodi halo koordenasaun no enkontru ho Prezidente Autoridade Munisípál no Administradór Munisípiu sira, ko’alia kona-ba oinsá atu implementa programa ne’e.

“Munisípiu hitu ne’ebé sai alvu hanesan, munisípiu Díli, Aileu, Ainaro, Ermera, Liquiça, Maliana no Baucau. Ida-ne’e mak sai alvu ba fundu transferênsia públiku ne’ebé mak prevee iha dirasaun ida-ne’e,” nia dehan.

Apoiu ne’e la’ós ba munisípiu hitu ne’e de’it maibé ba grupu kulturál sira iha munisípiu 12 inklui Rejiaun Administrativa Esepsiál Oé-Cusse. Foufoun grupu alvu sira-ne’e kada munisípiu ida iha grupu 14 maibé haree ba baze orsamentu ne’e prevee ba ne’e redús, entaun agora deside ba grupu kultura tradisionál sira kada munisípiu deside grupu 10 bazea ba proposta hosi komunidade sira submete ba SEAK.

Grupu kulturál tradisionál sira mak hanesan moradores (lia na’in), grupu srigala, tebedai, lakadou ba sira-ne’ebé halo dadolin, serimónia tradisioná no istória orál (populár) sira.

Grupu kulturál konteporanea hanesan grupu dansa sira-ne’ebé eziste iha Timor-Leste, ne’ebé grupu hirak ne’e halo mistura dansa moderna ho klásiku sira hanesan grupu Santo António, Wehale no Grupu Timor furak.

Grupu kulturál indústria kriativa naturál mak hanesan atividade sira-ne’ebé prodús ho liman badaen ezemplu hanesan bahat ai sai estátua, soru tais, halo sana rai, tuku osan mean, no selu-seluk tán.

Notísia Relevante: SEAK apoia konstrusaun uma-lulik 42 iha territóriu nasionál

Jornalista: Nelia Fernandes

Editór: Cancio Ximenes

HAKEREK NO HATÁN

Please enter your comment!
Please enter your name here