Produtu lokál iha Merkadu Taibesi. Imajen TATOLI/António Gonçalves

DILI, 15 juñu 2021 (TATOLI)–Reprezentante Nasionál World Food Programme (WFP), Dageng Liu, konsidera programa Cesta Bázika di’ak tebes tanba bele motiva liután agrikultór sira hasa’e produsaun.

“Programa Governu ne’e di’ak tebes tanba bele estimula agrikultór sira kuda barak liután, tanba ne’e mak kolleta hare iha postu administrativu Laleia, munisípiu Manatuto semana kotuk, ha’u partisipa no nota ida-ne’e di’ak tebes tanba bele fó motivasaun ba agrikultór sira,” Dageng Liu hateten, hafoin hasoru malu ho Primeiru-Ministru (PM), Taur Matan Ruak, iha Rezidénsia Farol, tersa ne’e.

Notísia relevante: MF halo ona pagamentu Cesta Bázika ba kompañia lokál 102

Reprezentante WFP dehan, Governu halo intervensaun liuhosi programa Cesta Bázika ho hanoin ida atu halo estabilidade ai-han iha rai laran durante pandemia.

Nune’e, WFP hamutuk ho United Nations Children’s Fund (UNICEF) no Ministériu Finansa (MF) konsege halo levantamentu dadus kona-ba seguransa ai-han iha Timor-Leste.

Notísia relevante: Relatóriu Avaliasaun Rápida: Uma-Kain 779 Husi Suku 82 Afetadu ba Seguransa Ai-han

“Haree ba nível má nutrisaun iha Timor-Leste, iha kategoria moderadu maibé rasa badak mak barak liu, ne’e signifika ita sei iha parte ida hamblaha, la’ós hahan laiha maibé hahan laho nutritivu. Tanba ne’e maka WFP koopera ho Ministériu Saúde liuliu Departamentu Nutrisaun hodi buka fundu ne’ebé daudaun ne’e Governu Xina iha komprimisu atu fó apoia, nune’e bele sosa hahan suplementár sira ba labarik idade menus hosi tinan lima no inan isin rua sira,” nia esplika.

Orsamentu ne’ebé sei apoia hosi Governu Xina ba populasaun hamutuk 12.000 sofre má nutrisaun iha Timor-Leste .

Tuir nia, Governu iha planu asaun annuál atu kombate mál nutrisaun iha Timor-Leste, maibé Governu labele mesak, presiza apoia parseiru no ajénsia internasionál sira.

“Má nutrisaun la’ós tanba hahan laiha atu han maibé hahan ne’ebé han laiha nutrisaun no vitamina. Realidade iha Timor-Leste hatudu katak populasaun balun la han fali hahan ne’ebé iha proteina maka’as,” nia hatutan.

Tanba ne’e, iha loron mundiál ai-han loron 16 outubru, WFP sei halo kampaña di’ak liután oinsá populasaun bele han ai-han nutritivu.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here