Reprezentante UNDP iha Timor-Leste (TL), Tuya Altangerel, oferese drone ba Sekretáriu Estadu SEPS, Joaquim Gusmão, iha edifísiu SEPS, Caicoli, tersa (15/06/21). Imajen/média SEPS.

DILI, 15 juñu 2021 (TATOLI)—Programa Dezenvolvimentu Nasaun Unida (UNDP sígla inglés), oferese  kámera drone hamutuk ne’en (6) ba Sekretária Estadu Protesaun Sivíl (SEPS).

Iha serimónia entrega, reprezentante UNDP iha Timor-Leste (TL), Tuya Altangerel, oferese uluk haat ba Sekretáriu Estadu SEPS, Joaquim Gusmão, iha edifísiu SEPS, Caicoli, tersa ne’e no tuir planu sei oferese tán rua iha tempu badak.

Notísia relevante:UNDP entrega tan ekipamentu item 34 ba MS

Tuya Altangerel, hateten ekipamentu ne’e sei apoia serbisu protesaun sivíl-nian iha tempu oin-mai, oinsá rekolla dadus no halo mapeamentu ba área risku dezastre naturál.

Ekipamentu ne’e ho espesifikasaun kompleta ho nia asesores tekonolojia moderna, bainhira akontese dezastre iha área rurál ne’ebé dalan kotu no labele asesu, bele utiliza drone hodi halo levantamentu dadus ba estragu-sira.

“Sente kontente ami entrega kámera drone hirak ne’e ba Sekretária Estadu Protesaun Sivíl,’’ Tuya Altangerel hateten.

Drone hirak-ne’e kompleta ho asesores hotu ho folin $6.000 kada drone, nune’e neen ho totál $36.000.

Oras-ne’e daudaun UNDP rekruta formadór ka espesialista ida, nune’e iha fulan jullu tinan ne’e bele hahú formasaun ba funsionáriu protesaun sivíl kona-bá utilizasaun ekipamentu hirak-ne’e.

SEPS, Joaquim Gusmão, agradese ba apoiu ne’e hodi bele tulun liu-tán serbisu-sira iha terrenu bainhira responde situasaun dezastre.

Ekipamentu ne’e sei distribui ba Diresaun Nasionál Jestaun Risku Dezastre Naturál (DNJRDN), nune’e Joaquim Gusmão husu ba funsionáriu-sira atu utiliza ho kuidadu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here