Ministra Saúde, Odete Maria Freitas Belo, troka nota entendimentu ho Embaixadór Uniaun Europeia (UE), Andrew Jacobs, no Reprezentante Organizasau Mundíal Saúde (OMS), Arvind Mathur, kona-bá apoia Governu hamenus impaktu hosi COVID-19, iha Novo Turizmu, tersa (15/06). Imajen Tatoli/Francisco Sony.

DILI, 15 juñu 2021 (TATOLI)—Uniaun Europeia (UE), oferese millaun $1 ba Ministériu Saúde (MS), hodi apoia prevensaun surtu COVID-19 iha Timor-Leste (TL).

Embaixadór UE iha TL, Andrew Jacobs, orgullu hodi selebra asinatura nota parseria, entre MS ho Organizasaun Mundiál Saúde (OMS) liu hosi gabinete umanitáriu, hodi apoiu TL iha resposta ba surtu COVID-19.

Notísia relevante:UE-Care Internasional oferese €100.000 ba vítima dezastre naturál

“Inisiativa ne’e atu apoia Governu TL hodi hametin liu tán kapasidade atu hamenus impaktu saúde hosi COVID-19, liuliu atu hadi’a jestaun kazu pozitivu iha nível ospitál rejionál-sira hanesan Baucau, Covalima, Maubise, Oe-cusse  no  Maliana,’’ Andrew Jacobs hateten iha diskursu, asinatura nota parseria iha Novo Turizmu tersa ne’e.

Iha fatin hanesan, Ministra Saúde, Odete Maria Freitas Belo, hateten asina akordu kona-bá apoiu ne’ebé UE fó ba Governu TL liu hosi MS ho orsamentu ne’ebé iha, sei jere hosi OMS.

“OMS  mak sei jere liu hosi atividade kuidadu krítikus. Ida-ne’e ita la ba sentru saúde no postu saúde no izolamentu sira iha Dili, maibé ita haree liu ba ekipamentu materiál-sira  iha ICU.

Nia dehan, apoiu ne’e sei konsentra atu tau-matan ba fasilidade-sira iha ICU ne’ebé seidauk kompletu, no iha hela fazekonstrusaun.

Partisipa iha serimónia ne’e parseiru dezenvolvimentu-sira, Diretór Jerál Kooperativu Ministériu Saúde, Diretór Apoiu Gabinete Planeamentu Politika no Kooperasaun Saúde, no entidade-sira seluk.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here