Logotipu TDD. Imajen Tatoli/Dok.

DILI, 15 juñu 2021 (TATOLI)—Tribunál Distritál Dili (TDD), kontinua hala’o julgamentu hodi rona deklarasaun arguidu, ba kazu abuzu podér, ne’ebé deskonfia komete hosi Funsionáriu Públiku (FP) na’in-13 hosi ministériu balun.

Tuir faktu akuzasaun hosi Ministéiru Públiku (MP) katak, iha indísiu sufisiente iha 21 marsu 2016, iha diresaun ministéiru balun ne’ebé arguidu no arguida-sira haknaar ba, hamosu programa workshop ka treinamentu ida iha Laclo-munisípiu Manatuto, Lequi Doe, munisiípiu Aileu, Atsabe munisípiu Ermera no Maubara, munisípiu Liquiça.

Notísia relevante:TDD adia julgamentu ba kazu abuzu podér ho pekulatu

Proposta ba programa iha kada munisípiu, hala’o ho durasaun tempu loron rua no proposta programa atu hetan aprovasaun hosi superiór ministériu ne’e iha 18 abríl 2016, no iha 14 juñu 2016, arguidu ALT emite karta konvite ho ajenda workshop ne’ebé hala’o iha Laclo, munisípiu Manatuto ne’ebé sei realiza iha 17 juñu 2016.

Iha 16 juñu 2016, arguidu ALT hatún  órden serbisu ida kona-bá dezlokasaun ba munisípiu Manatuto atu halo workshop durante loron-rua no deside arguidu JFSS mak hanesan xefe ekipa hamutuk ema na’in sia au-mezmu tempu arguidu ALT orienta arguida OFV atu prepara guia de marcha loron rua nian ba funsionáriu na’in-sia, ne’ebé hala’o worshop  ne’e no prepara mós guia de marcha ba arguidu CC, AB, FP maski sira la ba partisipa.

Iha loron hanesan, arguida prepara duni guia de marcha ba funsionáriu tékniku na’in-sia ne’ebé atu ba hala’o workshop iha Laclo, no prepara mós guia de marcha ba funsionáriu na’in-tolu seluk ne’ebé la partisipa iha workshop ho objetivu atu troka sira-nia guia de marcha  ne’ebé lakon no arguidu AB hanesan ajuda, tanba AB funsionáriu voluntáriu no iha loron hanesan mós arguido-sira asina guia de marcha.

Iha 17 juñu 2016, ekipa tékniku hosi Dili ba Manatuto, depois workshop termina no prosesu administrasaun ba guia de marcha hotu, arguido-sira ne’ebé hala’o workshop mós fila hikas mai Dili iha lorokraik.

Bainhira to’o iha Dili mak arguido-sira simu osan subsídiu (perdiem), inklui arguidu na’in-tolu seluk maski sira la partisipa iha workshop ne’e no lista simu osan subsídiu rasik.

Arguidu ALT hanesan diretór simu perdiem kada loron $60, nune’e simu ba loron rua hamutuk $120 no arguido-sira seluk simu perdiem kada loron $40 no loron rua $80, nune’e totál osan perdiem $750.

Tuir dekretu lei númeru 20/2010 kona-bá rejime suplementu remuneratóriu administrasaun públiku iha artigu 1 katak, sei konsidera hanesan loron ida tomak, hodi simu subsídiu $60 ba kargu xefia no $40 ba sira ne’ebé la’ós kargu xefia, kuandu toba kalan ida, maibé se la toba kalan ida konsidera loron sorin, kargu xefia simu subsídiu $30 no $20 ba sira ne’ebé la’ós kargu xefia.

Konsekuénsia nesesária hosi arguidu-sira nia hahalok fó prezuizu ba Estadu, maske hala’o viajen lokál loron sorin mós simu subsídiu kompletu no la’o loron ida, maibé simu loron rua, inklui arguidu na’in-tolu la partisipa mós simu hotu subsídiu.

Arguidu ho arguida-sira simu ona osan perdiem ba viajen lokál bainhira prosesu kriminál  la’o ona mak sira devolve fila-fali.

Arguidu ho arguida sira halo ho forma livre, deliberada no konsentimentu katak, konduta ne’ebé sira halo kontra lei, maibé sira atua nafatin.

Ho nune’e, arguidu ho arguida sira hanesan ko-autoria materiál ho forma konsumada komete krime abuzu podér ne’ebé previstu no punidu tuir artigu 297 númeru 1 hosi kódigu penál Timor-Leste.

Liu hosi audiénsia julgamentu ne’e, arguidu ho inisiál A nu’udár  funsionáriu administrasaun Laclo, hateten momentu ne’ebá nia parte hetan delegasaun hosi administradór, hodi delega nia atu reprezenta partisipa iha workshop ne’e.

Nia iha koñesimentu kona-bá konvite ba atividade worshop ne’ebé hala’o durante loron ida, maibé laiha koñesimentu kona-bá  guia de marcha  tanba la hetan esplikasaun  hosi ofisiál-sira ne’ebé realiza programa ne’e mai hosi nasionál rasik, no momentu ne’ebá asina de’it la verifika, hafoin simu perdiem.

“Faillansu hosi ha’u-nia parte, la haree didi’ak bainhira halo asinatura,’’ arguidu A konfesa iha sala audénsia TDD, Mandarin, Dili, tersa ne’e.

Hafoin rona tiha deklarasaun ne’e, Tribunál deside suspende fila-fali julgamentu ne’e hodi hein tama ba prosesu alegasaun hosi prokuradór no defensór públiku.

Antes ne’e Tribunál mós rona ona deklarasaun arguidu balun no balun mós hili direitu silénsia, hodi lakohi ko’alia iha audénsia atu hatan ba akukazasaun hosi MP.

Prosesu julgamentu ne’e prezide hosi juiz koletivu, Albertina Neves, Ercilia Rego, Afonso Carmona, MP reprezenta hosi prokuradór na’in-ida no arguidu ho arguida-sira hetan asisténsia legál hosi defensór públiku Estaquio Guteres, Henrique Maris no Jonas Henrique da Costa.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here