Sekertariádu Estadu Kooperativa (SECoop-Sigla Portugués) fó formasaun ba juventude na'in-200. Imajen Tatoli/ Francisco Sony

DILI, 15 juñu 2021 (TATOLI)-Sekretáriu Estadu Kooperativa (SEKoop), tersa ne’e, halo abertura formasaun “promotór no fasilitadór kooperativa” ba juventude hamutuk na’in-200 hosi munisípiu 12 inklui Rejiaun Administrativa Espesiál Oé-Cusse Ambeno (RAEOA).

Sekretáriu Estadu Kooperativa, Elizário Ferreira hateten, objetivu prinsipál hosi formasaun ida ne’e oinsá joven-sira sai organizadór, mobilizadór no motivadór kooperativa nian permanente iha nivel baze.

“Formasaun ida-ne’e akomoda ema hosi movimentu kooperativa no joven-sira mai hosi munisípiu 12 inklui RAEOA kada Postu Administrativu ida reprezenta ema na’in rua,” Sekretáriu Estadu Kooperativa, Elizário Ferreira hateten hafoin halo abertura ba formasaun ne’e iha salaun São José, Katedrál, Dili, tersa ne’e.

Nia afirma, bainhira joven-sira sai organizadór mak iha sira-nia fatin ne’ebé dezorganizadu la koñese kooperativa sira-nia prezensa atu organiza ema no eduka ema atu komprende kooperativa, no mobiliza populasaun hola parte kooperativa.

“Ita haree sira ne’ebé agrikultór organiza ba sira-nia kampu traballu hanesan natar, to’os, sira ne’ebé peskadór organiza sira ba tasi atu halo peska no sira ne’ebé komprende uitoan kona-ba negósiu bele integra agro-negósiu sira,” nia dehan.

Nia dehan, programa refere ida ne’e tama iha programa kooperativu SEkoop nian ne’ebé dehan, lori joven fila ba kampu, ho lema “Joven Kooperativa ba Joven”.

Nia afirma, hosi formasaun ne’ebé halo ne’e ba oin SEkoop nia maneira atu akompaña sira mak sei grupu Facebook, WhatsApp no E-mail ba hotu no sei iha Website objetivu asegura komunikasaun ida ne’ebé di’ak entre sira ne’ebé iha munisípiu to’o nivel suku iha informasaun ida de’it.

Iha fatin hanesan, Ministru Koordenadór Asuntu Ekonómiku (MCAE), Joaquim Amaral hateten, programa formasaun kooperativa ne’ebé SEkoop hala’o ida ne’e importante tebes tanba Timor-Leste hasoru krize boot pandemia COVID-19 ne’ebé ekonomia hetan difikuldade boot atu book-an. Nune’e formasaun ida ne’e joven-sira tuir formasaun iha esperiénsia bele dinamiza ekonomia iha nivel baze.

“Oportunidade ida ne’e, ha’u enkoraja sira oinsá sira aproveita matéria sira ne’ebé formadór-sira sei fó fulan ida-nia laran atu sira fila-fali ba ida-idak nia hela fatin sai  fali autór ekonómiku atu dinamiza setór ekonomia iha nivel suku sira,” nia hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here