Edifísiu Prokuradór Jerál Repúblika. Imajen Tatoli/Francisco Sony.

DILI, 15 juñu 2021 (TATOLI)—Ministériu Públiku (MP) notifika Deputadu na’in-ualu hosi Bankada Congresso Nacional de Reconstrução de Timorense (CNRT) hodi presta deklarasaun iha fulan-jullu kona-ba akontesimentu loron 18-19 maiu 2020 liubá.

Tuir notifikasaun hosi Ministériu Públiku ne’ebé konsta iha autu-inkéritu NUC.0036/20.PGGCC, eziste keixa ne’ebé aprezenta lezadu mak Estadu RDTL kontra deputadu no deputada sira hosi Bankada CNRT mak hanesan Maria Teresinha da Silva Viegas, Bendita Moniz Magno, Maria Gorumali Barreto, Ricardo Baptista, José Virgílio Rodriguês Ferreira, Maria Fernanda Lay, Maria Rosa da Câmara “Bisoi” no Virgínia Ana Belo.

“Iha notifikasaun ne’e indika atu deputadu bankada CNRT na’in-ualu ne’e tuir inkéritu nu’udar arguidu perante ba Ministériu Públiku ba prátika aktu prosesuál,” refere notifikasaun hosi Ministériu Públiku.

Iha notifikasaun hosi Ministériu Públiku ne’e notifika Deputada Maria Teresinha da Silva Viegas, atu presta deklarasaun iha Ministériu Púbiku iha loron 05 jullu 2021 tuku 09h00, Deputada Bendita Moniz Magno presta deklarasaun iha loron 05 jullu 2021 tuku 11h00, Deputada Maria Gorumali Barreto, iha loron 05 jullu 2021 tuku 14h00, Deputadu Ricardo Baptista, iha loron 06 jullu 2021 tuku 09h00, Deputadu José Virgílio Rodrigues Ferreira, iha loron 06 jullu 2021 tuku 11h00;

Nune’e mós Deputada Maria Fernanda Lay, sei presta deklarasaun iha Ministériu Públiku iha loron 06 jullu 2021 tuku 14h00, Deputada Maria Rosa da Câmara “Bisoi”, iha loron 07 jullu 2021 tuku 09h00 no Deputada Virgínia Ana Belo, iha loron 7 jullu 2021 oras 14h30.

Tuir notifikasaun ho númeru NUC 0055/20.PGCC ne’ebé Ministériu Públiku dirije ba Maria Rosa da Câmara “Bisoi” katak prosesu ida-ne’ebé mak rejistadu iha Ministériu Públiku, lezadu mak Estadu RDTL no arguidu mak José Virgílio Rodriguês Ferreira no sira seluk ne’ebé diskonfia ba krime koasaun hasoru órgaun konstitusionál artigu 204 no pertubasaun ba órgaun konstitusionál nia funsionamentu artigu 205 Kódigu Penál (KP).

“Hodi nune’e marka ona data ba ita atu marka prezensa iha Gabinete Sentrál Kombate Korrupsaun no Kriminalidade Organizada, Prokuradoria Jerál Repúblika-Colmera iha 7 fulan-jullu tinan-2021. Iha tuku 09h.00 dadeer, nu’udar arguida hodi fó deklarasaun iha auto inkéritu ne’ebé temi iha leten, no karik iha loron ne’ebé markadu la mai, sei selu multa,” notifikasaun hosi Ministériu Públiku ne’e haktuir.

Nune’e mós sansaun sira seluk ho natureza prosesuál ne’ebé lei espesialmente konsagra ona, tuir artigu 90 númeru 1 iha KPP nian.

“Karik la marka prezensa sei justifika falta ne’e iha prazu loron-lima (5) nia laran tuir artigu 79 númeru 1 KPP nian, no bele hetan detensaun iha tempu nesesáriu atu aprezenta iha autoridade judisiáriu kompetente tuir artigu 90 iha númeru 4 KPP nian, konjugadu ho artigu 217 númeru 2 hosi KPP,” MP esplika iha notifikasaun ba “Bisoi”.

Hatán ba notifikasaun ne’e, Reprezentante Bankada CNRT, Deputada Carmelita Caetano Moniz, haktuir deputadu na’in-ualu hosi bankada CNRT nian simu ona notifikasaun iha kinta-feira (10/06) semana kotuk relasiona ho akontesimentu iha loron 18-19 maiu 2020 liubá.

“Deputadu sira bankada Governu nian hato’o keixa katak deputadu CNRT sira iha momentu ne’ebá ne’e halo perturbasaun ba orden públika, depois akontesimentu ‘okupa’ tiha fatin Parlamentu Nasionál ho eleisaun ne’ebé imi hotu haree polísia haleu, eleisaun ne’ebé urna de’it mai hosi li’ur ne’ebé latuir funsionamentu normál,” Deputada Carmelita informa ba jornalista sira, iha uma fukun, tersa ne’e.

Deputada Bankada CNRT ne’e hateten, pozisaun deputadu na’in-ualu ne’e fó ona resposta ba  Prokuradór Titulár, Adérito Tilman liuhosi karta eskrita iha loron segunda (14/06) horisehik.

“Ami fiar katak sira sei haree prosesu ida-ne’e ho imparsiál no independente tomak. Ami fó ona resposta horisehik liuhosi eskrita de’it. Ami uza direitu ne’ebé hatuur iha Kódigu Prosesu Penál,” Deputada Carmelita hateten.

Nia haktuir, iha loron 19 maiu 2020 liubá deputadu sira hosi CNRT hatama kedas keixa hodi halo denúnsia krime ba Ministériu Públiku maibé denúnsia ne’ebé deputadu CNRT sira hatama ne’e, nia parte lahatene deputadu sira bankada Governu simu ona notifikasaun ka lae, tanba bankada CNRT mak denúnsia primeiru kedas kontra prosesu eleisaun ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here