DILI, 15 juñu 2021 (TATOLI)–Ministru Agrkultura no Peska (MAP), Pedro dos Reis, halo lansamentu esportasaun produtu lokál hanesan maek, kafé no seluk tan bá Indonezia no Thailándia, ne’ebé envolve kompañia nasionál neen.
“Ohin ita halo lansamentu esportasaun no iha tempu hanesan motiva ita-nia agrikultór no joven sira iha terrenu hodi hatudu katak maski ita iha hela situasaun pandemia nia laran, maibé ita-nia atividade ministériu ho emprezáriu sira nafatin la’o,” Ministru hateten hafoin seremónia lansamentu iha Colmera, tersa ne’e.
Kompañia lokál ne’ebé partisipa iha esportasaun maka Proloka, Timor Global, Kread Castle, Esmelia, Mandarlin no Tuli stard, ne’ebé ikus mai hetan sertifikadu esportasaun produtu lokál hosi MAP.
Biban ne’e, Ministru dehan sei fó oportunidade ba emprezáriu nasionál seluk atu kontinua halo esportasaun iha tempu tuir mai.
Iha fatin hanesan, Diretór Kompañia Proloka, Tji Vu Sing, agradese tanba hetan oportunidade hosi Governu partisipa iha esportasaun produtu.
“Produtu esporta iha kontentór haat, ho kuantidade tonelada 100 no produtu sira mak hanesan kafé, maek, kami, nuu no seluk tan,” nia akresenta.
Kompañia lokál ne’e hahú halibur produtu lokál sira desde fulan kotuk hodi bele atinje kuantidade.
“Ami hahú halibur produtu sira iha fulan-maiu, hanesan kafé no maek, ami buka hosi Ermera, Maubise Aileu, Ainaro no Same, enkuantu hanesan nuu, kami no produtu sira seluk mai hosi munisípiu parte loro sa’e nia,” nia hatutan.
Kompañia Proloka antes ne’e halo ona esportasaun produtu lokál ba Indénezia, Thalándia Vietname, Xina no Japaun.
“Ami antes ne’e halo ona esportasaun produtu lokál hanesan maek, kami no seluk tan ba nasaun balun hodi halo ba kosmetik, goma, mie no seluk tan,” nia hatutan.
Biban ne’e, Dirijente kompañia ne’e agradese mós ba parte kuarantena no alfándega tanba bele fasilita empreza nasionál trata dokumentu esportasaun ho di’ak.
Maski nune’e, Diretór Proloka husu ba Portu Dili atu autoriza ró tama semana-ida dala-ida, labele semana-rua dala-ida, nune’e bele ajuda atividade esportasaun iha Timor-Leste.
Iha fatin hanesan, Embaixadór Indonezia iha Timor-Leste, Sahat Sitorus, hateten, parte Indonézia sei tulun empreza timor-oan hodi manda produtu lokál ba rai-li’ur, tanba nia nota katak Timor-Leste nu’udár nasaun ida iha produtu lokál barak n’ebé presiza promove.
Nune’e mós, Embaixadór Thalándia iha Timor-Leste, Ekapol Poolpipat, haksolok bele partisipa iha lansamentu atividade esportasaun no promete sei apoia Timor-Leste hodi kontinua esporta produtu.
Jornalista : Natalino Costa
Editora : Julia Chatarina
