Área Munisípiu Viqueque. Imajen/Wikipedia

VIQUEQUE, 15 juñu 2021 (TATOLI)-Komunidade   Suku Matahoi, Postu Administrativu Uatulari, Munisípiu Viqeuque,  ho totál uma-kain 1.034 no abitante hamutuk 5.200.78 ho aldeia 12 enfrenta problema nesesidade infraestrutura báziku, hanesan la asesu ba bee-moos, eletrisidade no estrada la di’ak.

Notísia Relevante : Populasaun 75% asesu ona bee-moos hosi PNDS

Xefe  suku Matahoi, António Amaral, informa abitantes-sira iha Matahoi la asesu bee-moos ho di’ak no komunidade aldeia tolu hanesan Iraler, Ulusu ho Loco-Loco labele asesu ba estrada tanba at totál.

“Dezenvolvimentu ne’ebé la’o iha ha’u-nia Sku Matahoi iha aldeia hamutuk 12, iha aldeia tolu hanesan Iraler, Ulusu no Loco-Loco mak  estrada at totál ho problema labele asesu ba bee-moos,” António Amaral haktuir ba Agência Tatoli iha Administrasaun Munisípiu Viqueque, tersa ne’e.

Nia afirma, Aldeia Iraler totál uma-kain 176, abitante hamutuk 695 iha ne’ebá eskola   ensinu báziku   010,  ensinu Sekundáriu Daraloi no postu saúde, maibé oras ne’e abitante-sira  difikulta  tebetebes  ba bee-moos.

Nia informa iha 2019, veteranu Martino Purnama hola inisiativa rasik  hodi kolabora ho populasaun Loco-Loco   ke’e-bee matan ida mak  dada   ba Aldeia Loco-Loco hodi fasilita komunidade konsumu bee-moos ba nesesidade loron-loron nian.

Iha tinan hanesan, Xefe Suku Matahoi, António Amaral hato’o ona proposta ba Ministériu Obras Públiku (MOP)  atu bele solusiona problema bee-moos ho kondisaun estrada iha Suku Mathoi, maibé to’o agora seidauk iha resposta.

“Ha’u esforsu hato’o ona proposta ba MOP, maibé seidauk iha resposta. Ami hein de’it, bainhira maka Governu bele responde ba ami-nia proposta ne’e,” António Amaral hateten.

Jornalista : Vitorino Lopes da Costa

Editór      : Francisco Simões

HAKEREK NO HATÁN

Please enter your comment!
Please enter your name here