Vise-Ministru Interiór, António Armindo hamutuk ho Komandante Jerál PNTL, hala’o inspesaun ba karreta operasaun foun 21 iha aredór Komandu Jerál Caicoli, kuarta (02/05/21). Imajen/PNTL.

DILI, 15 juñu 2021 (TATOLI)—Komandante Jerál Polísia Nasionál Timor-Leste (PNTL), Komisáriu Polísia, Faustino da Costa ho Komandante munisípiu Dili, Superintendente Xefe, Henrique da Costa, entrega karreta operasaun hilux foun ida ba Polísia Eskuadra postu administrativu Ataúro, munisipiu Dili.

Superintendente Xefe, Henrique da Costa husu ba membru polísia eskuadra Ataúro atu utiliza karreta operasaun ne’e ho di’ak ba serbisu seguransa povu-nian iha illa ne’e.

Notísia relevante:Governu sei entrega karreta 21 ba PNTL

“Ita hetan karreta hosi Komandu Jerál hamutuk rua, antes ne’e ita simu uluk ona ida ba Komandu munisípiu ida ita entrega ba polísia eskuadra Ataúro,” Komandante Henrique da Costa hateten ba jornalista-sira iha Komandu PNTL, Caicoli, tersa ne’e.

Komandante Henrique da Costa mós husu ba Komandu Jerál, atu fó tan transporte ba eskuadra  Metinaro, Cristo Rei, Dom Aleixo no Na’in-Feto.

Entretantu, parte eskuadra Dom Aleixo iha hela karreta operasaun ida, maibé karreta ne’e la sufisiente atu halo operasaun durante oras 24, tanba kuaze loron no kalan halo atendimentu ba kazu-sira, nune’e karreta ida la sufisente atu tula polísia ba movimentu.

Tuir planu estratéjiku ne’ebé Komandu PNTL Dili halo, posíbel liu kada postu tenki iha karreta operasaun rua, atu bele utiliza hodi halo operasaun iha kalan no loron, nune’e bele kontrola kondisaun karreta labele aat lalais.

Daudaun-ne’e, membru PNTL Dili hamutuk 400-resin mak kolokadu iha eskuadra Dili, Vera Kruz, Metinaro, Ataúro, Dom Aleixo no Na’in-Feto.

Jornalista: Eugénio Pereira  

Editór: Cipriano Colo

HAKEREK NO HATÁN

Please enter your comment!
Please enter your name here