Vise-Ministru Administrasaun Estatál (MAE), Lino de Jesus Torrezão (kazau metan iha klaran) ho xefe aldeia distribui fós ba benefisiáriu. Imajen Tatoli/Osória Marques.

DILI, 15 juñu 2021 (TATOLI)—Governu liuhosi Ministériu Solidaridade Sosiál no Inkluzaun (MSSI) ho Ministériu Administrasaun Estatál (MAE), ohin halo lansamentu ba distribuisaun ai-han ba komunidade kbiit laek sira hodi distribui foos saka 55 ba benefisiáriu na’in-34 iha aldeia Zero Cinco, suku Fatuhada, postu Administrativu Don Aleixo, munisípiu Dili.

“Objetivu hosi lansamentu distribuisaun ai-han ba komunidade kbiit laek ne’e tanba ekonómia iha terrenu la la’o. Tanba ne’e, Governu nia prezensa iha Aldeia Zero Cinco ne’e atu fahe foos ba ita-nia komunidade ne’ebé laiha duni kbiit atu nesesita moris loron-loron nian,” Lino de Jesus Torrezão hateten ba jornalista sira iha sede Aldeia Zero Cinco.

Distribuisaun ida-ne’e nu’udar meu hodi responde ba situasaun menus ai-han iha ámbitu COVID-19 no inundasaun inklui situasaun sosiál ne’ebé populasaun enfrenta durante ne’e, nune’’e MAE ho MSSI trasa medida ne’ebé efetivu no efikásia hodi define matadalan hodi mobiliza foos saka 26.875 ba munisípiu hotu-hotu iha territóriu Timor-Leste.

“Munisípiu Dili ita mobiliza foos saka 10.375 ba aldeia 241. Maibé, munisípiu seluk ita mobiliza foos saka 1.500 ka 16.500 ne’ebé sei jere hosi ita-nia Prezidente Autoridade Munisípiu no Administradór Munisípiu sira,” nia haktuir.

Iha fatin hanesan, Xefe Aldeia Zero Cinco, Egídio Freitas hato’o agradesimentu ba Governu tanba fó apoiu ba ema kbiit laek sira hanesan ema ho defisiénsia, feto no mane faluk sira inklui oan-ki’ak nomós família afetadu ba dezastre naturál.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here