Diretora Ezekutiva Fundu Dezenvolvimentu Kapitál Umanu (FDCH), Leila Cárceres dos Santos, halo konferenisa imprensa kona-ba apoiu finanséiru ba estudante individuál-sira iha edifisiu FDCH, segunda (14/06). Imajen Tatoli/Francisco Sony

DILI, 15 juñu 2021 (TATOLI) – Diretora Ezekutivu Fundus Dezenvolvimentu Kapitál Umanu (FDCH), Leila Cárceres dos Santos, garante katak prosesu atendimentu subsídiu ba estudante individuál iha rai-laran no rai-li’ur sei halo ho transparente.

Notísia Relevante : FDCH apoiu subsídiu individuál ba estudante finalista

“Saida mak ami halo iha ne’e públiku tenke hatene. Ami simu estudante sira-nia proposta, ami mós hakarak públiku atu hatene,” diretora FDCH, Leila  Cárceres dos Santos informa ba jornalista sira iha edifísiu FDCH, Dili, foin lalais ne’e.

Leila esplika, FDCH iha tabela orsamentu rasik atu apoiu subsídiu individuál ba estudante-sira bazeia ba kustu da vida kada nasaun. Estudante rai-laran subsídiu individuál ne’ebé FDCH prepara ona ba nivel lisensiatura $500, mestradu ($750) no nivel doutoramentu ($1.000).

Ba estudante iha indonézia subsídiu individuál nivel lisensiatura hetan $750, nivel Mestradu $1.250, nivel Doutoramentu $1.500. Nune’e mós estudante iha Japaun, Brazil no Portugal ba nivel lisensiatura $3.000, Mestradu $3.500 no Doutoramentu $4.000.

“Estudante iha Malázia, nivel lisensiatura sei hetan $2.000, Mestradu $2.500 no Doutoramentu $3.000,” Leila Cárceres hateten.

Agora proposta ne’ebé proponente sira submete ba FDCH atu hetan subsídiu individuál ne’e hamutuk 10.641. Hosi totál proposta ne’e iha proposta 5.687 la konsege prosesa tanba laiha aneksu no balun dobru, tan ne’e, FDCH elimina tiha.

Nia klarifika katak hosi metade proposta ne’e iha dokumentu purvolta 2.029 depois verifika la kompletu entaun iha de’it dokumentu 3.025 mak kompletu.

“Hosi totál dokumentu 3.025 ne’e ami identifika barak liu estudante rai-laran hosi UNTL purvolta 698 proponente no Indonézia proponente 170,” nia tenik.

Proposta proponente nian bainhira submete mai FDCH kuandu verifika hotu ona sei envia filafali ba kada universidade atu publika iha universidade tantu lista ne’ebé pasa no lista ne’ebé la pasa hodi fó biban ba estudante sira atu akompaña.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here