Defensor Públiku Jerál, Câncio Xavier. Imajen Tatoli/Nelson de Sousa

DILI, 15 juñu 2021 (TATOLI)—Brazíl halo ona selesaun ba espesialista na’in-rua, tuir pedidu Defensoria Públika Timor-Leste (TL), atu bele fó apoiu iha área formasaun no defensoria.

“Brazíl selesiona ona espesilista na’in-rua, ida sei apoia formasaun iha Sentru Formasaun Jurídika no Judisíariu (SFJJ), no ida seluk sei koloka iha Defensoria. Parte Defensoria, hato’o pedidu katak, ita presiza ema ne’ebé iha esperiénsia hodi  halo adaptasaun lalais,” Defensór Públiku Jerál, Câncio Xavier hateten ba jornalista Agencia Tatoli, iha kna’ar-fatin Quintal Boot, Dili, tersa ne’e.

Notísia relevante:Janeiru-marsu defensoria públika atende kazu 484

Parte Defensoria reprezenta hosi, Defensór Públiku Jerál, Câncio Xavier, hala’o ona enkontru ho Embaixadór Brazil iha Timor-Leste (TL), Mauricio Medeiros de Assis, hodi ko’alia kona-bá prosesu fornesimentu  espesialista ne’e.

“Tanba ne’e, ko’alia ho Embaixadór Brazíl, nu’udár fonte informasaun atu halo komunikasaun liu tán,” Câncio Xavier subliña.

Entretantu, Governu Brazíl liuhosi Ajénsia Brazileira fó ona asisténsia téknika no asesoria makaas ba Defensoria Públika TL, durante tinan 18 liu hosi estabelesimentu akordu kooperasaun to’o ona sétimu etapa, ne’ebé remata ona iha 31 dezembru 2019.

Iha koperasaun ne’e, Brazíl fó apoiu hahú kedan inísiu instalasaun defensoria ho sistema sira hodi fortalese asesoria ba Defensór Públiku Jerál, atu bele haree lei sira, kondisaun kooperasaun, dezenvolve Konsellu Supeiór, dezenvolve pesa prosesuál no mós fasilita formasaun ba defensór-sira kona-bá kazu sira ho grau boot.

Durante kooperasaun ne’e mós ofisiál no defensár-sira ba halo estudu komparativu hodi haree ba área tékniku iha Brazíl.

Iha 07 juñu  2020, Governu liu hosi Ministru Justisa, Manuel Carceres da Costa ho Embaixadór Brazíl iha TL, asina ona nota entendimentu ho Ajénsia Brazileira ba Kooperasaun (ABC sigla portuges), hodi kontinua halo estensaun kooperasaun etapa-sira to’o 2023.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here