Admistradór postu admistrativu Vemasse, munisípiu Baucau, Sebastião Filomeno Correia. Imajen TATOLI/Natalino Belo

BAUCAU, 15 juñu 2021 (TATOLI)–Administradór postu administrativu Vemasse, munisípiu Baucau, Sebastião Filomeno Correia, hateten, nia parte fó sai ona orientasaun ba autoridade lokál sira atu halo sosializasaun kampaña vasina COVID-19 ba komunidade.

“Kona-ba sosializasaun vasina COVID-19, oras ne’e iha postu Vemasse la’o hela no ami mós orienta ona ba xefe suku no aldeia sira, ami harii grupu ida mobiliza komunidade atubele partisipa iha programa ida-ne’e ,” Admistradór postu hateten iha Admistrasaun Munisipál Baucau, Villa nova, tersa ne’e.

Notísia relevante: Lansa vasina doze daruak, PAM Baucau enkoraja hatutan informasaun

Kampaña ne’e rasik, autoridade postu Vemasse kolabora hamutuk ho Polísia Nasionál Timor-Leste (PNTL) eskuadra Vemasse, Sentru Saúde, inklui autoridade suku no aldeia.

“Iha kolaborasaun ne’ebé di’ak, hodi hamutuk sosializa ba komunidade atubele partisipa iha vasina COVID-19,” nia akresenta.

Nia dehan, daudaun ne’e iha postu Vemasse hahú hala’o vasina doze daruak ba ekipa liña frente.

Antes ne’e, Prezidente Autoridade Munisípiu Baucau, Olívio ‘Bou Lesa’ Freitas, fó hanoin atu autoridade lokál sira fahe informasaun ba komunidade iha área idaidak, kona-ba prevensaun COVID-19 liuhosi meius vasinasaun.

Postu Admistrativu Vemasse iha suku hitu, kompostu hosi suku Caicua, Loilubu, Ossouala, Ostiku, Uaigae, Uato-lari no Vemasse Villa, hosi totál pupulasaun hamutuk 14.202.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here