Cottage nu’udár fatin alojamentu ne’ebé lokaliza iha aldeia Tau-matan, suku Ritabou, postu adminiatrativu Maliana, munisípiu Bobonaro. Imajen/Kiera Zen.

BOBONARO, 15 juñu 2021 (TATOLI)—Uma du’ut  ka Cottage nu’udár fatin alojamentu ida ne’ebé lokaliza iha aldeia Tau-matan, suku Ritabou, postu adminiatrativu Maliana, munisípiu Bobonaro.

Uma duut ne’ebé agora sai uma alojamentu, harii hosi Timoroan ida ne’ebé iha kreatividade ho konseitu antigu, tanba konstrusaun ne’e maioria ho kombinasaun materiál lokál hanesan, ai-teka no du’ut manulain.

Notísia relavente:Turizmu komunitáriu nu’udar oportunidade estimula empregu iha rai-laran

Uma du’ut katak, uma hela fatin ho ninia istória mai hosi espíritu ukun rasik an, tanba uma duut hanesan istória ka identidade kulturál própria ne’ebé sei kontinua forte iha sosiedade Timorense hahú hosi beiala-sira to’o ohin loron.

Kiera Zen konstrui uma ho materiál lokál atu dignifika no valoriza mós luta ne’ebé ukun na’in-sira halo, katak, ukun an hanorin Timoroan atu uza rekursu ho materiál no han hahán ne’ebé kuda-rasik, la’ós depende ba nasaun seluk.

Konstrusaun ne’ebé simples, didin ho ai-teka, taka ho duut manulain no futu metin uza tali Olanda, iha uma ninin, jardín hele’u ho fatuk Metan foho-nian.

Liman bada’en ne’ebé hafutar uma ne’e, mai hosi nasaun viziñu Indonézia hamutuk ho Timoroan sira, maibe konseitu ba dezeñu mai hosi artista Kiera Zen.

Maski prosesu ne’e presija tempu lubuk ida, maibé ikus mai fatin ne’e konsege konvense ema barak no dada atensaun turista estranjeiru ho lokál hakarak aluga uma ne’e iha tempu balun.

“Espíritu ne’e mai hosi independénsia. Signifika, bainhira hakarak ukun ha’u-nia an, ha’u tenke fo hán ha’u-nia an, uza ha’u-nia kapasidade no rekursu. Nune’e, ha’u bele iha liberdade tomak,” Kiera Zen  konta-tuir ba Agência Tatoli, iha kafetaria, Ritabou, tersa ne’e.

Konstrusaun remata iha iha dezembru 2020, vizitante estranjeiru no lokál barak mak pasa férias iha fatin ne’e.

Bainhira Kazu COVID-19 aumenta, Governu impoin serka sanitária iha Dili, inklui Bobonaro, nune’e impede sidadaun-sira atu vizita fatin ne’e.

Alojamentu naturál ne’e, iha kuartu haat, kuartu rua bele akumula ema na’in-rua ho presu normál kalan ida $60 no kuartu Single ho presu $35 to’o $50, kompletu ho televizaun inklui fasilidade-sira seluk ne’ebé halo uza materiál lokál.

Alende ne’e, iha mós fatin kafetaria, Mini Bar ne’ebé halo vizitante-sira bele sente anin fresku, ne’ebé tuir planu sei aumenta tán cottage haat atu bele akomoda ema barak.

Kona-bá atendimentu, oras-ne’e daudaun iha funsionáriu nai’in-lima ne’ebé prepara ai-han lokál ne’ebé kuda rasik, hanesan fos-rai, modo kanko, modo-mutin, repollu no ai-han fresku, bele husu tuir menu ne’ebé prepara.

Kiera Zen nu’udár na’in ba alojamentu ne’e, husu governu atu kontinua investe makaas hodi dezenvolve setór turizmu lokál, tanba bele atrai ema estranjeiru no bele aumenta rendimentu nasaun nian.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here