Vasina AstraZeneca. Imajen TATOLI/António Gonçalves

DILI, 15 juñu 2021 (TATOLI)-Populasaun Munisípiu Aileu, tersa ne’e, hahú simu vasina AstraZeneca doze dahuluk nian.

Notísia Relevante : Administradór Aileu husu komunidade simu vasina AstraZeneca

Vasina AstraZeneca iha Munisípiu Aileu ne’e halo abertura hosi Ministériu Asuntu Parlamentár no Komunikasaun Sosiál  (MAPKOMS) liuhosi serimónia vasina dahuluk ba abitante na’in-11.

Diretór Servisu Munisipál Saúde Aileu, Julio dos Santos hateten, objetivu MAPCOMS ba halo lansamentu vasina AstraZeneca doze dahuluk nian ba populasaun  Aileu atu fó ezemplu no korajen ba komunidade katak Governu sosa vasina refere atu salva komunidade hosi COVID-19 la’ós atu habadak komunidade-nia vida.

“Komunidade na’in-11 ne’ebé ohin simu uluk ne’e hahú hosi tinan 18 ne’ebé moras atan hanesan rins no idade 60 ba leten,” Julio dos Santos, informa ba Agência Tatoli liuhosi telefónika, tersa ne’e.

Mensajen ne’ebé Ministru Asuntu Parlamentár Komunikasaun Sosiál, Francisco Martins da Costa Pereira Jerónimo, husik hela ba populasaun Aileu mak labele fiar lia falsu ka hoax ne’ebé kontinua espalla iha mídia sosiál liuliu Facebook ne’ebé dehan ema ne’ebé simu vasina nia-vida sei badak.

“Fiar ba Governu tanba Governu laiha hanoin at ba nia povu, maibé prontu buka nafatin solusaun halo prevensaun kontra surtu COVID-19,” Julio dos Santos haktuir mensajen MAPKOMS nian iha serimónia abertura vasina ne’e iha Aileu.

MAPCOMS husu ba komunidade Aileu hotu-hotu partisipa simu vasina refere, nune’e bele kontra moras COVID-19 tanba moras refere to’o agora seidauk iha ai- moruk ruma atu kura maibé iha de’it vasina oinsá aumenta ema-nia imunidade hodi kontra COVID-19.

“Vasina ne’ebé ohin lansa ne’e hahú ohin ba oin sei fó ba ekipa liña frente hamutuk 704 restu ba komunidade hotu iha Aileu tomak, liuliu idade avansadu no moras króniku sira bainhira la to’o mak ita sei haruka pedidu ba Governu Sentrál haruka tan vasina Sinovac mai tanba daudaun ne’e komunidade iha Munisípiu Aileu tomak hakarak atu simu vasina ba doze dahuluk hamutuk ema 7.208,” Julio dos Santos hateten.

Jornalista       : Arminda Fonseca

Editór              : Francisco Simões

 

HAKEREK NO HATÁN

Please enter your comment!
Please enter your name here