Admistradór postu admistrativu Vemasse, munisípiu Baucau, Sebastião Filomeno Correia. Imajen TATOLI/Natalino Belo

BAUCAU, 15 juñu 2021 (TATOLI)—Administradór postu admistrativu Vemasse, munisípiu Baucau, Sebastião Filomeno Correia, hateten, nia parte sei nafatin esforsu aselera konstrusaun infraestrutura bázika hanesan estrada, bee-mos no eletrisidade ba komunidade iha suku Ossouala.

“Seidauk asesu, maibé planu ne’e ami finaliza ona, agora filafali ba Orsamentu Jerál Estadu (OJE), karik buat hotu la’o loloos, ita sei realiza,” Administradór dehan iha Admistrasaun Munisipál Baucau, Villa nova tersa ne’e.

Kuaze suku hotu iha postu ne’e asesu ona infraestrutura bázika, maibé hela de’it suku Ossouala no Waiharebo’o mak to’o agora seidauk asesu eletrisidade, estrada inklui bee-mos.

“Iha Suku Ossouala, bee-mos tama ona maibé kanu mak estraga, estrada no eletrisidade planu hotu ona maibé hein de’it bainhira mak atu implementa,” nia akresenta.

Liuhosi relatóriu hosi postu, informasaun hato’o hotu ona ba munisípiu, nune’e hein prosesu implementasaun.

Antes ne’e, Admistradór postu Vemasse koordena ho postu Venilale, Xefe suku Ossouala inklui Padre Locateli rasik kolabora hamutuk halo proposta konjunta ida hato’o ba Institutu Jestaun no Ekipamentu (IGE, sigla portugés), ne’ebé daudaun ne’e loke ona dalan hosi parte suku Berkoli, postu Venilale, liga ba suku Ossouala, postu Vemasse, ho distánsia kilómetru 25 kilometru.

“Ami mos ezije nafatin, ha’u halo ona proposta ida ba IGE karik bele kontinua to’o iha suku,” nia hatutan.

Kona-ba eletrisidade ba Suku Ossouala, tuir planu sei liga hosi suku Uatulari ba Ossouala.

Suku Ossouala rasik konsideradu hanesan suku rurál, ne’ebé seidauk asesu ba infraestrutura bázika, nune’e sai atensaun Ministru Obra Públika, Salvador Eugênio Soares dos Reis Pires, ne’ebé ho inisiativa rasik halo vizita hodi observa deretamente progresu dezenvolvimentu iha suku refere ligadu ba infraestrutura bázika hanesan eletrisidade.

Entretantu, suku Ossouala rasik kompostu hosi aldeia Caidenulale, Hoinawai, Lolinuno, Uainacnassa no Uma Ana Ico, ho totál populasaun hamutuk ambitante 1.067.

Jornalista  : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here