Diretora PNDS munisípiu Baucau, Amélia Maria Viegas. Imajen TATOLI/Natalino Belo

BAUCAU, 15 juñu 2021 (TATOLI)—Diretora Programa Nasionál Dezenvolvimentu Suku (PNDS) munisípiu Baucau, Amélia Maria Viegas, hateten daudaun ne’e prosesu tomak implementasaun ‘Uma Kbiit Laek’ ramata ona no tuir planu sei lansa fatuk dahuluk iha fulan ne’e.

“PNDS Baucau planu ona iha semana rua tuir mai sei lansa fatuk dahuluk Uma Kbiit Laek iha suku Triloka, postu administrativu Baucau villa iha loron 28 juñu, ba uma ida reprezenta uma tolu, ein jerál hotu-hotu la’o ona iha prosesu kotasaun no postu balun foin halo prosesu kotasaun,” Diretora dehan iha ninia knaar fatin iha administrasaun munisípiu Baucau, Villa nova, tersa ne’e.

Notísia relevante: Governu hahú ona konstrui “Uma Kbiit Laek” 1.254 iha territóriu nasionál

Prosesu hahú hosi sosializasaun nível munisipál no finaliza iha nível suku, kontinua ba verifikasaun kandidatu benefisiáriu, prosesu aprovizionamentu no ramata iha avaliasaun.

Diretora esplika, antes atu hahú implementasaun Uma Kbiit Laek, PNDS Baucau rasik orienta tuir livru matadalan ne’ebé guia, hanesan kritéria ba benefisiáriu, ne’ebé autoridade lokál mak envolve direta iha ekipa verifikadór benefisiáriu, lidera hosi Xefe aldeia no envolve mós Ofisiál Polísia Suku (OPS) no reprezenta hosi joven suku na’in-ualu.

“PNDS la la’o mesak, iha kooperasaun másimu ho autoridade suku,” nia akresenta.

Nia garante, bele implenta tuir alvu tamba orsamentu daudaun ne’e transfere ona ba konta bankária suku sira nian.

“Ita garante katak iha fulan ida-ne’e nia laran implentasaun bele hahú,” nia hatutan.

Totál orsamentu ba programa Uma Kbiit Laek, suku ida hetan osan $54.000, fahe ba kustu operasionál $3.000 no kustu infraestrutura $51.000, tuir tipu uma.

Uma Kbiit Laek rasik bazeia ba kritéria no iha tipu rua hanesan medida 48m² ho kustu $17.000 no 37 m² ho kustu entre $14.000 to’o $16.000.

PNDS Baucau rasik tuir planu sei kontrui Uma Kbiit Laek hamutuk 177 iha tinan 2021.

Liuhosi programa ne’e sei kontrui uma iha suku 59, iha Baucau, ne’ebé kada aldeia ida uma tolu.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here