Embaixadór Uniaun Europeia iha Timor-Leste, Andrew Jacobs. Imajen TATOLI/António Gonçalves

DILI, 14 juñu 2021 (TATOLI)–Embaixadór Uniaun Europeia (UE), Andrew Jacobs, hateten, desde Timor-Leste rejista kazu infetadu COVID-19 dahuluk to’o agora, organizasaun multilaterál ne’e apoia ona millaun $7,8 hodi kombate pandemia globál iha Timor-Leste.

“Desde COVID-19 mosu iha Timór iha marsu 2020, ami apoia ona ba programa sira kombate COVID-19 ho osan millaun $7,8,” Diplomata ne’e relata hafoin sorumutuk ho Primeiru-Ministru, Taur Matan Ruak, iha Rezidénsia Farol, segunda ne’e.

Notísia relevante: UE ajuda Euro millaun ida hodi responde ba agravamentu surtu COVID-19

UE fó apoiu finanseiru ba Timor-Leste millaun $6,4 inklui millaun $1,2 ne’ebé disponível hosi Organizasaun Mundiál Saúde (OMS) ba servisu imediata COVID-19 hosi Eskritóriu Umanitária Uniaun Europeia (ECHO, sigla inglés).

Apoiu ne’ebé fó, inklui ona millaun $2,4 ba OMS iha Timor-Leste, hodi disponibiliza ninia servisu hamutuk ho Ministériu Saúde (MS) atu hamenus impaktu saúde hosi moras hirak ne’ebé bele hada’et iha komunidade nia le’et, liuliu COVID-19 no kontribui ba konstrusaun sistema saúde ne’ebé forte, efikás no reziliente iha Timor-Leste.

UE fornese ona apoiu liuhosi organizasaun sosiedade sivíl sira, atu ajuda ema vulnerável sira ne’ebé afetadu COVID-19 no liuhosi inisiativa spotlight, foka liu ba asisténsia ba sira ne’ebé iha risku violénsia doméstika.

Aleinde ne’e, tempu badak UE sei selebra akordu ida ho OMS hodi apoia tan orsamentu millaun $1,2 ba programa reforsa kapasidade prevensan iha munisípiu sira hodi kombate pendemia globál.

“Uniaun Europeia komprometidu apoia nafatin Timor-Leste kombate COVID-19, liliu ba programa vasinasaun iha kapitál rasik no munisípiu sira,” Embaixadór subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here