iklan

NASIONÁL, BAUCAU, HEADLINE, MUNISÍPIU, SEGURANSA

Situasaun seguransa iha Baucau la’o hakmatek

Situasaun seguransa iha Baucau la’o hakmatek

Mapa Baucau. Imajen/Espesiál

BAUCAU, 14 juñu 2021 (TATOLI)–Komandante Polísia munisípiu Baucau, Superintendente Xefe, Armando Monteiro, hateten, jeralmente situasaun seguransa iha rejiaun ne’e kontroladu.

“Jeralmente ita-nia Baucau hakmatek, espera ba oin joven sira hahú konsolida-an, hakribi violénsia, problema ruma mosu sira sempre iha koordenasaun, mantein komunikasaun entre joven, no ba autoridade seguransa oinsá harii Baucau di’ak ba Baucau-oan tomak, ida-ne’e mak motto ba ita-nia joven hamutuk ho autoridade seguransa,” Komandante Polísia munisípiu Baucau, hateten iha Hospital Regional Eduardo Ximenes (HorEX), Villa nova, Baucau, segunda ne’e.

Armando Monteiro dehan, maski kazu sivíl balun sempre akontese, maibé la’ós sai preokupasaun no difikulta estabilidade seguransa iha munisípiu Baucau.

Tuir autoridade seguransa, semana kotuk Polísia munisípiu Baucau rejista asidente ida, ne’ebé akontese domingu (13/06), iha Vemasse no dadaun ne’e halo tratamentu inklui halo prosesu investigasaun.

“Hafoin akontementu, komunidade no eskuadra Polísia Vemasse halo atendementu no horiseik kedan, ita-nia tránzitu mós mai halo ona ezaminasaun iha terrenu no halo konstrusaun ba asidente iha lokál akontesimentu,” nia akresenta.

Aleinde ne’e, relasiona ho implentasaun Serka Sanitária, Komandu munisípiu Baucau rasik nafatin apela ba komunidade, bainhira halo movimentu tenki kumpre nafatin regra protokolu saúde.

Notísia relevante: Governu kontinua renova Serka Sanitária iha Baucau no hakotu Viqueque

Daudaun ne’e, Polísia Nasionál Timor-Leste (PNTL) rasik hahú orienta ona servisu intelejénsia hodi halo observasaun ba adeptu futeból sira ne’ebé akonpanã jogu taxa Europa.

“Husu atu nafatin mantein hakmatek bainhira akompaña ekipa favóritu joga,” nia hatutan.

Jornalista: Natalino Belo

Editora: Julia Chatarina

iklan
iklan

Leave a Reply

iklan
error: Content is protected !!