Kondisaun Mota Comoro bainhira inundasaun iha domingu (04/04). Imajen TATOLI/António Gonçalves

DILI, 14 juñu 2021 (TATOLI)—Tuir Dadus hosi Sekretária Estadu Protesaun Sivíl (SEPS), oras-ne’e daudaun, sei iha família hamutuk 200-resin ho ema 1000-resin mak kontinua hela iha fatin akollamentu, tanba uma hetan estragu makas hosi inundasaun iha 04 abríl.

Família 200-resin ne’e, kontinua okupa sentru akollamentu hitu iha Dili hanesan, Dom Bosco Comoro, Manleu-ana, Masin-Lidun, Tasi-tolu, Hera no Komunidade Madre sira-nian.

Notísia relevante:SETP hahú identifika fatin harii bairru foun ba afetadu inundasaun

To’o oras ne’e SEPS, seida’uk bele fó apoiu materiál konstrusaun tanba sei hein planu Governu nian ba reintegrasaun iha fatin foun no la’ós ba fila-fali iha fatin anteriór ne’ebé risku ba dezastre naturál.

“Ita iha prosedimentu ba apoiu materiál konstrusaun hanesan agora ita fó apoiu ba uluk família sira ne’ebé la’ós hela iha fatin risku ba dezastre, maibé ba sira ne’ebé hela iha fatin risku hanesan mota ninin, foho lolon ho lagoa ninin, ita seida’uk bele fó tanba hein planu Governu ba re-alozamentu,” Diretór Nasionál Jestaun Risku Dezastre, Agostinho Cosme Belo, hateten ba jornalista Agéncia Tatoli iha knaar fatin Bemori, Dili, segunda ne’e.

Iha prosedimentu ne’e mós SEPS halo akordu ho família ne’ebé simu ona no sei simu materiál konstrusaun, atu bele utiliza ba re-konstrusaun no bandu labele faan tutan.

SEPS rasik sei kria ekipa monitorizasaun ho koordenasaun autoridade lokál sira sei tun fila-fali ba terrenu atu bele monitoriza katak, apoiu ne’ebé Governu fó, komunidade utiliza duni ba konstrusaun hela fatin.

Dadaun SEPS verifika hela  família 3.000-resin iha Dili mak presiza hetan apoiu materiál konstrusaun tanba balun uma hetan estragu kamán, natón no aat totál.

Hosi númeru  ne’e SEPS seida’uk identifika loloos família hira mak hela iha fatin risku, maibé ba hirak ne’ebé la hela iha fatin risku  sei hetan apoiu no sira ne’ebé iha fatin risku seida’uk bele fó  apoiu hodi hein planu Governu ba re-alozamentu.

Tuir dadus hosi Ministériu Administrasaun Estatál (MAE), identifika iha Dili família 2.558 mak hela iha fatin risku ba dezastre naturál hanesan mota ninin, foho lolon no lagoa ninin.

Antes ne’e, Sekretáriu Estadu Terras no Proriedade (SETP), Mario Ximenes, hateten identifika ona rai iha fatin tolu hodi prepara ba planu re-alozamentu família iha Dili, ne’ebé hela iha fatin risku.

Fatin tolu ne’e identifika provizóriu  hanesan Bekudu ho Tibar nu’udár rai Estadu, maibé iha Hera área Hali dolár ba parte foho hun nu’udár rai privadu no Estadu presiza hola.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here