Ekipa hosi CAC, akompaña hosi DNTM halo observasaun ba ró-ahi KMP Tranship II, ne’ebé atraka iha Portu Dili, Colmera, sesta (04/06). Imajen TATOLI/Natalino Costa

DILI, 14 juñu 2021(TATOLI)–Adjuntu Komisáriu Komisaun Antí Korrupsaun (CAC, sigla portugés), Luís Oliveira Sampaio, informa, rezultadu inspesaun komisaun ba ro-ahi KMP Tranship, iha semana hirak liubá, daudaun ne’e iha nível diskusaun internál.

“Ami sei deskute hotu internalmente no haree situasaun tanba dadus balun iha materiál investigasaun, ami ladún fó sai, tanba ida-ne’e hanesan prosesu investigasaun no ita tenke kumpre segredu justisa tanba sasán sira ne’e sensetivu atu divulga,” Adjuntu Komisáriu CAC informa iha ninia knaar fatin, Farol, segunda ne’e.

CAC ho akompañamentu hosi Diresaun Nasionál Transporte Marítima (DNTM), hosi Ministériu Transporte no Komunikasaun (MTK) halo inspesaun ba ro-ahi Tranship II iha loron 04 juñu foin lalais.

Notísia relevante: CAC halo inspesaun ba ró-ahi KMP Tranship II

Tuir Luís Oliveira, relatóriu inspesaun sei aprezenta mós ba Primeiru-Ministru (PM), Taur Matan Ruak, maibé molok ne’e sei kruza informasaun sira.

“Ha’u seidauk iha oráriu fixu bainhira mak atu hatama dokumentu ba Xefe Governu, tanba ami presiza kruza tan informasaun sira, tanba dokumentu sira kuandu ita haruka ba Primeiru-Ministru, tenke ida-ne’ebé finál, ita labele submete informasaun la akuradu,” Adjuntu Komisáriu CAC akresenta.

Iha sesta (11/06), PM Taur no delegasaun halo viajen traballu ba Ataúro ho ró-ahi Tranship II, maibé bainhira to’o iha portu Bikeli, Ataúro, ró-ahi ne’e labele atraka tanba kestaun tékniku balun, maski ikus mai bele rezolve.

Notísia relevante: PM agradese ultrapasa difikuldade bá Ataúro ho ró-ahi Tranship II

Governu liuhosi MTK halo ona kontratu ho kompañia Atralata Estrategi hosi Indonézia hodi bele opera ró-ahi KMP Tranship II iha Timor-Leste, ne’ebé ró-ahi ne’e atraka iha Portu Dili iha loron 25 maiu.

Kontratu ho kompañia estranjeiru ne’e, ba kada fulan $220.000, ho ninia kapasidade tula pasajeiru hamutuk na’in-300 inklui sasán ho kapasidade tonelada 1.000-resin.

Tuir planu, ro-ahi ne’e temporáriamente sei opera entre Dili-Oé-cusse no Dili-Ataúro hodi hein ro-ahi Belin Nakroma no Success ne’ebé iha prosesu manutensaun.

Notísia relevante: Ró-ahi KMP Tranship II halo operasaun kada semana dala-ida

Antes ne’e, iha prosesu investigasaun, CAC rekomenda ba Ministru Transporte no Komunikasaun, José Agostinho da Silva, atu temporáriamente suspende operasaun ro-ahi ne’e, tamba iha prosesu aprovizionamentu aluga Tranship II hamosu dúvida no ho hanoin kondisaun ne’e bele prejudika funsionáriu públiku MTK bainhira Governu kontinua deside halo operasaun.

CAC rasik halo prosesu inspesaun, bazeia ba mandatu ne’ebé hatur ona iha Lei númeru 8/2009 kona-ba Kriasaun CAC, ne’ebé nu’udár instituisaun independente ho knaar atu prevene no kombate krime korrupsaun.

Nune’e, iha atividade inspesaun iha semana kotuk, deteta katak mosu irregularidade iha prosesu aprovizionamentu.

Aleinde ne’e, rezultadu inspesaun MTK antes ne’e kontráriu ho CAC, ne’ebé oegaun independente ne’e lori ona dadus hodi kruza verbalmente ho Dirijente DNTM no rekomenda halo komparasaun no re-inspeksaun fali tuir dadus hosi komisaun.

Maski CAC estuda no kruza informasaun sira, maibé nota katak hafoin lori ro-ahi Tranship II mai Timór mak foin selebra kontratu no halo kontratu mak foin orienta halo prosesu aprovizionamentu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here