Estádiu Munisipál Dili. Imajen/Dok.LFA

DILI, 14 juñu 2021 (TATOLI) –Sekretaria Estadu Juventude no Desportu (SEJD) ezekuta ona  Orsamentu Jerál Estadu (OJE)  2021 nian ho persentajen 35.4 (%).

“Ita hotu hatene katak ezekusaun ida agora ne’e la hanesan ho tinan sira ba kotuk tanba pandemia COVID-19, atividade barak paradu liu-liu desportu sira entaun fó mós impaktu ba ita nia ezekusaun,” diretór nasionál administrasaun no finansas SEJD, Guido Monteiro, informa ba Agência Tatoli iha edifísiu SEJD, Dili, segunda ne’e.

Nia dehan, atividade maioria kona-bá juventude labele realiza tanba halibur ema barak maibé kona-ba formasaun online hala’o.

OJE 2021 aloka ba SEJD ho montante $9.476.147, maibé agora daudaun tama ona ba segundu trimestral foin mak atinje 35%   iha item kapitál menór, saláriu vensimentu, transferénsia públiku.

sei realiza projetu boot tolu

Biban ne’e, Guido Monteiro informa mós katak tinan ne’e SEJD sei realiza projetu boot tolu. Iha ne’ebé hosi orsamentu kapitál dezenvolvimentu line ministerial nian.

“Alokasaun ba kapitál dezenvolvimentu nian iha projetu tolu mak ita atu halo, finalizasaun verifikasaun iha Ajénsia Dezenvolvimentu Nasionál (ADN) iha ona, agora to’o ona iha faze lori dezeñu ba Ministériu Obras Públiku atu hetan asinatura nune’e bele hahú anunsia ba prosesu konkursu públiku,” Guido Monteiro esplika.

Projetu tolu ne’e mak hanesan, hala’o konstrusaun ba kampu multifunsaun futeból nian ida iha Taibessi, reabilitasaun ba kampu tenis iha Universidade Nasionál Timor Lorosa’e (UNTL) nia sorin hodi prepara ba jogu eskolár CPLP no ida mak halo ka konstroi hikas uma nahe biti-boot iha resintu SEJD.

Total orsamentu ba projetu tolu ne’e hamutuk $600.000- resin, kompostu hosi alokasaun ba projetu kampu tenik ho montante $100.000-resin, kampu multifunsaun ($200-resin) no uma nahe biti-boot  ($200.000-resin).

 Nia dehan, projetu kontinuasaun ba fundu infrastrutura iha tolu hanesan Jináziu Dili agora besik finaliza ona tama iha faze diskusaun adisionál no ADN halo ona verifikasaun hela de’it relatóriu finál ba adisionál seidauk hatene loloos montante hosi adisionál ne’e.

Enkuantu rua seluk mak hanesan, Estádiu Munisipál Dili no Estádiu Manatuto ne’ebé sei hakdasak to’o agora.

“Estádiu Dili uluk kompañia ida mak halo agora hapara ona nia, ita selu hotu ona sasán sira ne’ebé mak nia hatama besik ona ba faze finál. Iha mós Estádiu Manatuto ne’ebé kuaze tinan barak lala’o ninia prosesu verifikasaun adisionál remata ona, hein kontinuasaun ba prosesu tuir mai, orsamentu seidauk hatene loos hira tanba seidauk iha faze ikus bainhira remata ona mak ita foin hatene osan hira loos hosi projetu kontinuasaun ne’e,” nia esplika.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here