Ema ho Defisiénsia hatudu talentu iha área desportu iha komemorasaun loron mundiál ba Ema ho Defisiénsia ne’ebé hala’o iha Palásiu Prezidente Nicolau Lobato. Imajen/Mídia PR.

DILI, 14 juñu 2021 (TATOLI)—Ministériu Solidariedade Sosiál no Inkluzaun liuhosi Dirasaun Nasionál Protesaun Ema ho Defisiénsia (DNPDPD)-sigla portugés) iha planu atu servisu hamutuk ho Sekretáriu Estadu Formasaun Profisionál no Empregu sei fó formasaun ba Ema ho Defisiénsia (EhD) sira iha Timor-Leste.

“Ami iha ona planu atu servisu hamutuk ho SEFOPE nune’e fasilita formasaun ba ita-nia maluk defisiénsia sira,” Diretór Nasionál Protesaun Ema ho Defisiénsia, Mateus da Silva, hateten ba Ajénsia TATOLI, iha nia knaar fatin, Caicoli, Dili, segunda ne’e.

MSSI no SEFOPE sei fasilita formasaun sira iha área karpintária, informasaun no komunikasaun nian inklui oinsá Ema ho Defisiénsia sira mós tuir formasaun kona-ba igualdade inkluzaun atu bele asesu ba transporte hanesan karreta, aviaun no ró.

Aleinde ne’e, sira mós sei tuir formasaun kona-ba desportu no justisa nian, tanba ema defisiénsia matan sira labele asesu ba justisa entaun sira mós presiza hetan formasaun ba lian jestuál nian.

“Planu hirak ne’e, parte DNPDPD sei koordena ho SEFOPE,” nia dehan.

Tuir loloos, iha tinan ida-ne’e, sei fó opurtunidade ba Ema ho Defisiénsia hamutuk na’in-10 maibé tanba pandemia COVID-19 entaun formasaun ne’e labele hala’o. Bainhira pandemia COVID-19 ne’e ramata, DNPDPD sei aproxima ho SEFOPE, nune’e iha tempu besik bele halo formasaun ba Ema ho Defisiénsia sira.

“Ida-ne’e ita hatama iha planu. Pelumenus iha tinan ida, ita sei fó formasaun ba ema na’in-10 de’it, nune’e ho ema natoon ne’e sira fasil aprende teória no halo pratika. Bainhira ramata tuir formasaun, ita bele fasilita sira servisu iha empreza públiku ka privadu ruma no mós ba iha instituisaun Estadu no Governu nian,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here