Diretór Nasionál Promosaun Direitu ba Ema ho Defisiénsia, Mateus da Silva. Imajen TATOLI/Osória Marques.

DILI, 14 juñu 2021 (TATOLI)—Ministériu Solidariedade Sosiál no Inkluzaun (MSSI) liuhosi Dirasaun Protesaun Ema ho Defisiénsia, atribui bolsa da mãe no subsídiu ba ema ho defisiénsia bazea ba dadus sensu uma kain 2015 nian.

Diretór Nasionál Protesaun Ema ho Defisiénsia (DNPDPD)-sigla portugés), Mateus da Silva, informa tuir dadus ne’ebé parte Ministériu Saúde (MS) liuhosi grupu Washington halibur liuhosi kestionáriu hodi identifika Ema ho Defisiénsia mós barak liu, nune’e to’o ohin loron dadus Ema ho Defisiénsia sira hosi Ministériu Saúde ho sensu uma-kain nian la hanesan.

“Durante ne’e, ami fó bolsa da mãe no subsídiu ba invalidéz ba EhD bazea ba dadus sensu uma kain 2015 nian. Kona-ba dadus hosi Ministériu Saúde (MS) ho programa hosi grupu Washington nian ne’ebé tún direta ba iha komunidade no uza kestionáriu, nune’e parte Ministériu Saúde (MS) rejista hamutuk 52.000. Dadus MSSI bazea ba sensu uma-kain 2015 nian ne’e hamutuk 38.118,” Mateus da Silva informa ba Ajénsia TATOLI, iha nia knaar fatin, Caicoli, Dili, segunda ne’e.

Hosi totál 38.118 ne’e, sira-ne’ebé asesu ba bolsa da mãe iha territóriu nasionál hamutuk 951 no sira-ne’ebé tama iha lista benefisiáriu invalidéz ne’ebé mak hetan subsídiu iha 2020 ne’e hamutuk 8.200 ne’ebé kompostu hosi feto 3.993 no mane 4.207.

Aleinde ne’e, nia informa, to’o agora MSSI seidauk halo pagamentu ba Ema ho Defisiénsia ne’ebé moras mentál tanba ema hirak ne’e laiha kartaun eleitorál maibé MSSI sei buka meu ida hodi hakbesik ba autoridade lokál, nune’e ema moras mentál sira mós bele asesu ba lista invalidéz nian.

Institutu Nasionál Seguransa Sosiál (INSS) sei servisu hamutuk ho Ministériu Saúde (MS) atu Ema ho Defisiénsia sira-ne’ebé laiha kapasidade servisu ne’e bele rejiztu iha INSS, tanba Governu iha obrigasaun atu fó apoiu liuhosi subsídiu no atribui bolsa da mãe ba sira.

“Kona-ba bolsa da mãe ne’e husu ba inan-aman sira atu rejistu iha INSS, nune’e INSS ho DNPDPD hodi halo levantamentu dadus iha família katak labarik defisiénsia ne’e laiha kapasidade ekonómika família nian atu atende ba nia oan tanba Governu iha obrigasaun atu ajuda,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here