Komandante Polísia munisípiu Baucau, Superintendente Xefe, Armando Monteiro, hola parte iha vasina AstraZeneca doze daruak. Imajen TATOLI/Natalino Belo

BAUCAU, 14 juñu 2021 (TATOLI)—Komandante Polísia munisípiu Baucau, Superintendente Xefe, Armando Monteiro, partisipa iha kampaña vasinasaun AsreaZeneca doze daruak iha Baucau, ne’ebé sai hanesan programa prioridade ba Komandu Polísia Nasionál Timor-Leste (PNTL), nune’e nia espera membru sira bele partisipa másimu.

“Iha doze dahuluk liubá, elementu balun seidauk vasina tamba iha razaun saúde no bazeia rekomendasaun médiku, entaun vasina doze daruak, espera membru hotu ne’ebé seidauk simu, bele simu doze dahuluk no ba doze daruak,” Superintendente Xefe hateten iha Hospital Regional Eduardo Ximenes (HorEX), Villa nova, Baucau segunda ne’e.

Notísia relevante

Nia dehan, ohin loron partisipa ona vasina, automátikamente membru sira iha dever hola parte tanba nu’udár liña frente iha parte seguransa.

“Komandu munisípiu Baucau, ohin ida-ne’e hanesan loron dahuluk vasina, ha’u hanesan Komandante munisípiu partisipa dahuluk no loron tuir mai membru sira automátikamente simu doze daruak,” Armando akresenta

Tuir Armando, durante ne’e PNTL hala’o knaar ne’ebé iha ligasaun diretamente ho komunidade, nune’e orientasaun Komandu klaru, katak membru presiza iha seguransa saúde uluk mak bele halo atendimentu ba komunidade ho di’ak.

Komandante Polísia konsidera, vasina doze daruak iha Baucau bele minimiza propagasaun surtu COVID-19.

“Povu Baucau ho esperansa tomak hotu bele minimiza no hasa’e imunidade, maski moras ida-ne’e sirkula hela iha ita-nia rai laran, maibé ne’e hanesan salva guarda ba idaidak ninia saúde hodi nune’e luta hasoru COVID-19,” nia hatutan.

Entretantu, seremónia kampaña vasinasaun AstraZeneca doze daruak ne’e partisipa hosi Prezidente Autoridade Munisípiu Baucau (PAM), Olívio ‘Bou Lesa’ Freitas, Eis PAM, António Guterres, Diretór Saúde Baucau, Domingos Guterres, Komandante Komponente Terrestre Primeiru Batallaun, Tenente Koronel Rineldi Cortereal e Silva, inklui Komandante Polísia munisípiu Baucau, Superintendente Xefe Armando Monteiro.

Jornalista: Natalino Belo

Editora: Julia Chatarina

HAKEREK NO HATÁN

Please enter your comment!
Please enter your name here