Eis PAM Baucau, António Guterres, bainhira hola parte vasina iha HorEX, Villa nova, Baucau, segunda (14/06). Imajen TATOLI/Natalino Belo

BAUCAU, 14 juñu 2021 (TATOLI)Eis Prezidente Autoridade Munisípiu (PAM) Baucau, António Guterres, konsidera importante atu autoridade lokál lansa informasaun relasiona ho importánsia vasina kontra COVID-19 ba komunidade, nune’e bele partisipa másimu iha kampaña vasina hanesan maneira atu garante saúde públika.

“Nu’udar sidadaun no autoridade lokál, tenke divulga nafatin informasaun ba sosiedade atu labele tauk no pániku ba vasina, nune’e bele hasa’e imunidade ba idaidak nia-an, hafoin ita bele hateten ba sira katak saúde ne’e iha idaidak nia liman,” António Guterres hateten ba Agência TATOLI, iha Hospital Regional Eduardo Ximenes (HorEX), Villa nova, Baucau segunda ne’e.

Tuir nia, presiza lansa informasaun liuhosi koordena, komunika, koopera, kolabora no konsulta.

“Hau baibain uza K5, hanesan koordenasaun ne’e save importante, hafoin tenki komunika beibeik tanba hosi komunikasaun mak ema bele entendente no ema koopera ona no sente katak nia bele koopera iha área ne’ebé, hafoin kolabora ba área ne’e no ikus mai konsulta,” nia akresenta.

António hatutan, bainhira kestaun lima ne’e la’o ho efetivu maka bele hamosu konsultasaun públika, katak entidade hotu importante atu halo konsultasaun, nune’e ema sente katak aktu saida de’it mak iha sosiedade nia le’et bele konsidera hanesan ninian.

Aleinde ne’e, Eis PAM dehan, kestaun konsiénsia mak importante liu, tanba ne’e tenke kontinua divulga informasaun ba públiku, nune’e komunidade sira bele akonpanã iha rede sosial no nafatin halo sosializasaun ba komunidade kona-ba meiu prevensaun COVID-19.

“COVID-19 hamosu impaktu pozitivu no negativu, liuliu estabilidade polítika, sosiál no ekonomia,” nia akresenta.

Implementasaun Serka Sanitária iha Baucau rasik hamosu impaktu iha área sosiál hanesan saúde no edukasaun, no impkatu ekonomia mak setór agrikultura no negósiu.

“Entaun setór tolu mak vitál liu hanesan saúde, edukasaun no agrikultura, oinsá mak ema tenke halo negósiu ho distánsia fíziku no fase liman bebeik,” nia tenik.

Tuir dadus nasionál, númeru kazu COVID-19 iha Baucau to’o domingu (13/06), kazu detetadu hamutuk 27, kazu ativu 118, rekuperadu 243, kazu rejistadu 361 no óbitu ida.

Jornalista: Natalino Belo

Editora: Julia Chatarina

HAKEREK NO HATÁN

Please enter your comment!
Please enter your name here