Produtu lokál iha bazar postu administrativu Ossu, sábadu (12/06). Imajen TATOLI/Vitorino Lopes da Costa

VIQUEQUE, 12 juñu 2021 (TATOLI)—Administradór postu administrativu Ossu, Agustinho de Sousa, relata, durante ne’e autoridade no seguransa halo kontrolu presu sasán nesesidade bázika sira iha merkadu postu ne’e no identifika katak la’o normál.

“Iha ha’u-nia postu Ossu, durante Serka Sanitária nian laran, sasán sira-nia presu la’o normál tanba kompañia sira hosi munisípiu Baucau mós fa’an hotu iha Osso, ne’ebé ami hamutuk parte seguransa observa loja no kioske sira ne’e no haree presu la’o normál,” Administradór postu Ossu, hateten ba Agência TATOLI, iha resintu administrasaun munisípiu Viqueque, sábadu ne’e.

Autoridade postu ne’e esplika, atu tama iha Serka Sanitária, hahú hosi loron 08 maiu 2021 mak folin foos kilograma 25 sa’e ba $13 no balun $14, hafoin ida ne’e kompañia sira husu karta autorizasaun hodi sosa foos marka MTCI, hodi tama iha Ossu, nune’e presu hahú tuun ba normál ho $12 no balun $ 12,50 inklui presu nesesidade bázika mósla’o normál.

“Iha munisípiu Viqueque, autoridade lokál, komuinidade, sosiadade sivíl no Polísia munisipál nafatin halo kontrolu ba negosiante sira. Tanba ne’e mak bainhira loja sira hasa’e presu mak bainhira parte kompetente sira identifika, sei fó xamada ba negosiante sira,” nia akresenta.

Jornalista: Vitorino Lopes da Costa

Editora: Julia Chatarina