Ekipa MTKI no EDTL, E.P halo enkontru koordensaun dada liña eletrisidade ba sítiu turíztiku. Imajen/MTKI

DILI, 12 juñu 2021 (TATOLI)–Ministériu Turizmu, Komérsiu no Indústria (MTKI) no Eletricidade de Timor-Leste, Empreza Públika (EDTL,E.P) halo enkontru koordenasaun hodi ko’alia kona-ba dada liña eletrisidade ba sítiu turíztiku sira ne’ebé indentifikadu no planu atu dezenvolve.

“Ami mai hodi hala’o koordenasaun serbisu entre liña ministériu sira, hodi koopera malu ligadu ho infrastutura bázika iha sítiu turíztiku sira ne’ebé tama ona iha programa Turizmu Komunitáriu, liuliu foka ba suku sira ne’ebé ministériu estabelese ona grupu traballu,” Diretór Jerál Turizmu, Jelino Soares, hateten liuhosi nota ne’ebé Agência TATOLI asesu, sábadu ne’e.

Notísia relevante: MTKI estabelese grupu traballu turizmu komunitáriu iha suku Nunu-Mogue

Nia dehan, sítiu turíztiku balun seidauk asesu eletrisidade, hanesan suku Uaimori iha munisípiu Viqueque no Ramelau iha munisípiu Ainaro.

“Tanba ne’e, ami mai hodi propoin parte EDTL.E.P bele tau iha planu orsamentu tinan oin,” nia akresenta.

Polítika VIII Governu maka atu hadi’a ekonomia povu nian, tanba ne’e dalan ida mak hosi setór turizmu.

“Ita atu dada turizta, maibé la prepara kondisaun mínimu, ema sei la mai no soe osan iha ita-nia rain,” Dirijente ne’e hatutan.

Iha biban hanesan, Prezidente Konsellu Administrasaun EDTL,E.P, Paulo da Silva, dehan hanesan empreza estatál ida, orientasaun maka oinsá bele hetan lukru.

Governu transforma EDTL hosi Diresaun Jerál  iha Ministériu Obra Públika (MOP), ba empresa públika iha tinan kotuk, ho knaar importante atu redús kustu produsaun enerjétika, moderniza ou dijitalizasaun liña distribuisaun enerjia, hasa’e reseita, eletrifikasaun nasionál no iluminasaun ba sidade kapitál.

Notísia relevante: Governu Deside EDTL Sai Empreza Públika

“Haree oinsá atu asegura eletrisidade to’o komunidade nia uma, ami prontu investe tuir nesesidade ne’ebé mak iha, tanba EDTL nia orientasaun atu hetan lukru hosi investimentu ne’ebé investe ona,” nia esplika

Nune’e, Dirijente ne’e  prontu apoiu MTKI hodi dada ahi ba sítiu turíztiku indentifikadu.

“Ami presiza hetan dadus hanesan distánsia sítiu ida ba iha estrada públiku, modelu dezenvolvimentu saida mak atu aplika, sítiu refere besik komunidade nia hela fatin ou lae, nune’e karik ami bele investe eletrisidade ne’e labele nonok de’it, tenke hamosu lukru ruma hosi ne’ebá no karik investe tiha sé loos mak sei selu nia kustu,” nia subliña.

Nia sujere atu MTKI bele koordena filafali ho parte autoridade lokál hodi define sé loos mak responsabiliza ba kustu refere.

Atu dada liña eletrisidade iha sítiu turíztiku sira, EDTL hatudu prontidaun no husu parte MTKI atu identifika sítiu turíztiku hotu iha territóriu tomak ne’ebé iha planu atu dezenvolve hodi submete ba parte empreza estatál ne’e, nune’e bele konsidera no halo planu investimentu.

“Uaimori tama ona iha planu investimentu, maibé sei hein dezeñu Bill of Quantity (BoQ) no parese sei loke prosesu konkursu iha agustu ou setembru tinan nee, nune’e ami hein fali hosi sítiu turíztiku sira seluk,” nia Informa.

Enkontru koordenasaun ne’e partisipa hosi Diretór Jerál Turizmu, Jelino Soares, akompaña hosi Diretora Nasionál Dezenvolvimentu Turiztiku, Rosita Garcia no Diretór Nasionál Turizmu Komunitária, Moises Tillman inklui Prezidente  Konsellu Administrasaun EDTL, E.P, Paulo da Silva.

Jornalista: Florêncio Miranda Ximenes

Editora: Julia Chatarina