VIQUEQUE, 12 juñu 2021 (TATOLI)—Sekretáriu Estadu Peska, Elídio de Araújo, informa, Governu iha progrma apoia ró fiberglass ba perkadór sira iha tinan ne’e nia laran, nune’e bele hadi’a ekonomia.
“Governu planeia apoia ró peska ba grupu peskadór tanba nu’udár parte hosi ita, tanba ne’e bele hadi’a vida ekonomia peskadór sira nian,” Sekretáriu Estadu informa ba Agência TATOLI, iha salaun enkontru administradór munisípiu Viqueque, bainhira ba diálogu ho grupu peskadór sira iha Beaço, sábadu ne’e.
Iha tinan 2020, Governu apoiu uluk rede ikan ba grupu peskadór, maibé la taka dalan iha planu, tinan ne’e, Governu tau iha programa atu fahe ró ho marka fiberglass hamutuk unidade 1.010 hodi fahe ba munisípiu sira, ne’ebé kada munisípiu sei hetan ró unidade 10 no Governu mós sei fó formasaun téknika ba grupu peskadór hodi motiva seluk hasa’e ekonomia familiár.
Governante ne’e hatutan, diálogu ho grupu peskadór atubele hatene dezafiu saida mak sira hasoru hodi hato’o ba Governu sentrál atu tau ba programa tinan oin.
“Tanba ne’e, ha’u mai hasoru adiministradór Viqueque molok ba halo diálogu ho grupu peskadór no iha tinan 2021 ne’e Governu tau ona planu sosá ró industriál unidade rua, nune’e la taka dalan ba ita-nia joven sira serbisu iha laran, maibé joven mak tenke prepara-an,” nia akresenta.
Iha fatin hanesan, Adiministradór munisípiu Viqueque, Januario Soares ‘Bolly’, konsidera, vizita diálogu Sekretáriu Estadu ne’e parte importante tebes hodi bele dezenvolve setór sira iha munisípiu viqueque inklui mós área peska.
“Nune’e bele rona rasik preokupasaun l hosi peskadór, karik iha halerik ruma, óinsa Governu bele responde ba nesidade peskadór sira,” nia tenik.
Líder lokál ne’e husu ba komunidade sira atu dedika-an ho di’ak, ho grupu peskadór hodi bele hadi’a ekonomia no Governu mós presiza fó kapasitasaun peska hodi bele serbisu la’o di’ak.
Jornalista: Vitorino Lopes da Costa
Editora: Julia Chatarina
