Xefe Departamentu SMI, Adelaide Maria Tilman. Imajen TATOLI/Vitorino Lopes da Costa

VIQUEQUE, 12 juñu 2021 (TATOLI)—Ekipa Saúde Maternu Infantil (SMI) munisípiu Viqueque, halo sensiblizasaun vasina AstraZeneca doze daruak ba líder komunitáriu sira hodi enkoraja populasaun partisipa másimu ho konsiénsia maski la’ós obrigatóriu.

Tuir planu, vasina doze daruak ne’e sei lansa iha munisípiu sira iha loron 14 juñu, ne’ebé antes ne’e lansa ona iha Dili, iha kinta (10/06).

Xefe Departamentu SMI, Adelaide Maria Tilman, hateten, distribuisaun AstraZeneca hosi nasionál sei to’o ohin iha Viqueque, nune’e iha segunda sei hahú ho liña frente sira.

“Ami konvida líder komunitariu sira hodi halo sensiblizasaun vasina faze daruak no ami mós husu líder sira atu habelar informasaun relasiona ho vasina ba komunidade sira nune’e vasina bele tama aldeia no suku, nune’e komunidade sira labele tauk vasina,” Adelaide Maria Tilman, informa, ba Agência TATOLI, iha salaun administrasaun munisípiu Viqueque, sábadu ne’e.

Tuir Responsável ne’e, kona-ba preparasaun vasina, ekipa SMI sira halo ona planu no lojíztika, ne’ebé prepara hotu hodi hein hala’o serbisu, nune’e bainhira doze daruak AstraZeneca ramata mak sei haree  instituisaun sira ne’ebé mak seidauk simu vasina.

Nia hakutir, iha faze dahuluk funsionáriu instituisaun sira iha Viqueque rona hoax iha rede sosiál, entaun kuaze funsionáriu barak mak lakohi simu vasina, maibé hafoin realiza liu loron rua, funsionáriu sira hakbesik fali ba sentru hodi simu vasina.

Nune’e, nia husu liña frente sira iha munisípiu Viqueque hamutuk na’in-1.093 atu partisipa másimu iha segunda, hodi simu vasina doze daruak.

Jornalista: Vitorino Lopes da Costa

Editora: Julia Chatarina