Imajen/Mídia ZEESM.

OÉ-CUSSE, 11 Juñu 2021 (TATOLI)—Autoridade RAEOA liuhosi Sekretáriu Rejionál Asuntu Administrasaun servisu hamutuk ho Sekretáriu Rejionál Asuntu Agríkultura, hahú implementa ona dekretu-lei nú.12/2014 kona-bá retrisaun movimentu tráfiku animál iha área urbana, bandu ema atu labele husik animál la’o livre iha sidade laran

Sekretáriu Rejionál Asuntu Administrasaun, Martinho Abani Elo, hateten atu asegura meiu ambiente ne’ebé moos no rezolve área urbana tuir lei refere, sira rekruta ona funsionáriu órden públiku na’in-10 atu destaka iha kada aldeia hodi observa movimentu animál ninian atu garante sidade Oé-Cusse matak no buras.

Sekretáriu Rejionál Asuntu Administrasaun, Martinho Abani Elo. Imajen/Mídia ZEESM.

“Oé-Cusse dezenvolvimentu ZEESM iha ona, ita haree kapaas tanba ahi lakan iha oras 24 nia laran. Ita mós persiza hamatak liután sidade sai furak, animál tenke dook hosi vila ka sulan iha luhan laran. Ami bandu ema labele husik animál la’o livre iha área urbana,” Martinho Abani informa ba Agência TATOLI, via telefónika, sesta ne’e.

Molok atu implementa dekretu-lei ne’e, nia parte konvida uluk autoridade lokál, administradór postu administrativu sira atu diskute no halo promosaun liuhosi públikasaun spanduk no aviza liuhosi Rádio Komunidade Atoni-Lifau, atu komunidade sira bele kumpre no labele husik animál la’o iha vila laran,

“Maibé, ikus-mai laiha rezultadu signifikadu entaun ita hahú halo rekrutamentu ba funsionáriu orden públika no destaka sira iha kada aldeia no bairru no iha fulan juñu ne’e hala’o ona operasaun,” nia dehan.

Operasaun ne’e, nia dehan, sei la para tanba autoridade RAEOA hakarak sidade Oé-Cuse sai matak ne’e animál labele estraga sasán no soe foer iha estrada públiku hahú hosi fronteira Sakáto, suku Nipani, to’o merkadu Tono suku Cunha no ponte Noe-Fefan suku Lifau nian.

“Iha fatin hirak ne’e, funsionáriu orden públika sira loro-loron sei halo observasaun ba iha sidade sira-ne’e,” nia hateten.

Dekretu-lei nú.12/2014 kona-bá retrisaun movimentu tráfiku animál iha área urbana ne’e prodús iha 2014 iha mandatu primeiru sekretáriu rejionál administrasaun sedauk aplika ho másimo, tanba iha tinan hirak liu-bá ne’e seidauk estabelese funsionáriu órden públiku atu ezekuta lei refere.

Iha sorin seluk, Sekretário Rejionál Asuntu Agríkultura, José Eta hateten totál animál kapturadu iha fulan juñu nia laran hahú hosi 01-09 juñu ne’e hamutuk 110, kompostu hosi bibi 108 no karau rua (2).

“Oras ne’e dadaun relatóriu hosi departamentu pekuária relata katak iha bibi hitu (7) mak hasai ona hosi Centru Produsaun Animál (CPA) tanba na’in ba animál kumpre selu multa ho montante $350.00, tanba kada bibi ida selu $50.00. Pagamentu ne’e, na’in rasik ba selu diretamente liu-hosi konta bankaria ZEESM iha BNU sukursál Oé-Cusse,” nia dehan.

Bainhira halo ona kapturasaun ba animál sira mak sira-nia parte sei ba entréga iha Centru Produsaun Animál (CPA) iha Maquelab, suku Taiboko, postu administrativu Pante Makasar.

“Iha ne’e, ita sei fó tempu ho durasaun loron 10 ba animál na’in sira atu koopera selu multa. Liu-tiha loron 10 mak autoridade iha obrigasaun tuir dekretu lei no.12/2014 sei halo sansaun ba animál na’in sira,” nia dehan.

Jornalista: Abilio Elo Nini

Editór: Cancio Ximenes

HAKEREK NO HATÁN

Please enter your comment!
Please enter your name here