SAMES distribui vasina AstraZeneca doze daruak ba munisípiu-sira, iha Armajén Kampung Alor, loron Sexta (11/06). Imajen Tatoli/Francisco Sony.

DILI, 11 juñu 2021 (TATOLI)—Serbisu Autónomu Medikamentu no Ekipamentu Saúde (SAMES), halo ona distribuisaun ba vasina AstraZeneca doze daruak ne’ebé oferese hosi COVAX Facility, ba munisípiu 12, inklui Rejiaun Administrativa Espesiál Oe-cusse Ambeno (RAEOA).

Diretór Ezekutivu SAMES, Santana Martins, esplika ohin halo distribuisaun ba munisípiu 11 ho RAEOA tanba munisípiu Dili distribui antes ona.

Notísia relevante:AstraZeneca doze daruak 100.800 to’o ona TL

”Ohin ita hahú halo distribuisaun no tau prioridade ba RAEOA tanba aviaun ZEESM mak transporta,”’ Santana Martins, hateten ba jornalista-sira iha SAMES, Kampung Alor, sesta ne’e.

Ekipa SAMES distribui kedan ba munisípiu Liquiça, Bobonaro, Ermera, Aileu, Ainaro, Manufahi no  Covalima, enkuantu transportasaun ba munisípiu haat hanesan Manatuto, Viqueque, Baucau no Lautém sei hala’o iha aban dadeer.

Tuir dadus no tabela distribuisaun, munisípiu Aileu doze 490, Ainaro 507, Baucau 1.322, Bobonaro 955, Covalima 643, Dili 1.400, Ermera 872, Lautém 698, Liquiça 710,  Manatuto 518, Manufahi 536, RAEOA 656 no Viqueque 773 ho totál doze 10.080.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here