Deputada Maria Angelina Lopez Sarmento. Imajen Tatoli/Egas Cristóvão.

DILI, 11 maiu 2021 (TATOLI)—Vise-Prezidente Parlamentu Nasionál, Deputada Maria Angelina Lopes Sarmento, hateten revizaun ba Lei Organizasaun Funsonamentu Administrasaun Parlamentár (LOFAP) no Rejimentu Parlamentu Nasionál (RPN) iha ona prosesu diskusaun.

Parlamentu Nasionál halo hela prosesu diskusaun molok halo revizaun ba lei númeru 12/2017, 24 maiu, kona-ba Organizasaun Funsionamentu Administrasaun Parlamentár (LOFAP) no Rejimentu Parlamentu Nasionál.

“Iha lei ne’ebé mak importante atu halo revizaun iha tempu badak mak Lei Organizasaun Funsionamentu Administrasaun Parlamentár (LOFAP) no Rejimentu Parlamentu Nasionál (RPN), tanba lei rua ne’e tenke kabe ho proposta Lei Enkuadramentu Orsamentál,” nia informa ba jornalista sira iha Parlamentu Nasionál, kinta ne’e.

Nia fó-sai katak, iha loron kuarta (09/06) liubá reuniaun líder bankada parlamentár sira halo diversu kona-ba lei rua ne’e maibé sei iha prosesu diskusaun.

Deputada Bankada Partidu Libertasaun Populár (PLP) ne’e fó-sai katak, proposta Lei Enkuadramentu Orsamentál (LEO) ne’e sei substitui Lei Orsamentu no Jestaun Finanseira (LOGF-sigla portugés).

“Kuandu lei ne’e vigora sei implika ba lei sira seluk, liuliu LOFAP no RPN, tan ne’e mak atu halo revizaun ba lei rua iha ona prosesu diskusaun,” nia dehan.

Iha parte seluk, Vise-Prezidente Parlamentu Nasionál ne’e informa períodu resesu deputadu sira-nain hahú iha 15 jullu no termina 15 setembru, maibé proposta-lei no projetu-lei ne’ebé balun tama ona iha prosesu diskusaun entaun posibilidade resesu ne’e fulan ida de’it.

“Entaun, tuir konsensu iha líder bankada ko’alia ona katak resesu ne’e loloos fulan-rua, talves redús fulan ida de’it, ne’ebé sei realiza fulan agostu to’o setembru de’it. Agora desizaun final kabe ba plenária mak sei deside liuhusi votasaun ida,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here