Ministra Negósiu Estranjeiru no Kooperasaun, Adaljiza Albertina Xavier Magno. Imajen TATOLI/Egas Cristóvão

DILI, 11 juñu 2021 (TATOLI)-Prezidente Repúblika, Francisco Guterres “Lú-Olo”,  la partisipa iha XIII Konferénsia Xefe Estadu no Governu hosi Comunidade dos Paises da Lingua Portuguesa (CPLP) ne’ebé sei realiza Luanda, 17 jullu 2021.

Notísia Relevante : PM konfirma la partisipa Simeira CPLP iha Luanda

Ministra Negósiu Estranjeiru no Kooperasaun (MNEC-sigla portugés), Adaljiza Albertina Xavier Reis Magno, informa Prezidente Repúblika deside la partisipa iha simeira CPLP tanba  sitasaun rai-laran.

“Iha audiénsia, ohin, ho Prezidente Repúblika ami ko’alia kona-bá simeira CPLP. Ha’u mai husu Prezidente Repúblika nia desizaun ba partisipa hotu simeira ka lae, maibé haree ba situasaun rai-laran, Prezidente Repúblika deside  la partisipa, entaun ha’u ba, depois sei akompaña enviadu espesiál hosi Estadu nian,” Ministra Adaljiza Magno hateten ba jornalista-sira hafoin halo audiénsia ho Prezidente Repúblika iha Palásiu Prezidensiál, Dili, sesta ne’e.

Nia hatutan, iha simeira CPLP ne’e tema ka tópiku ne’ebé Angola sei foti mak, “Kooperasaun Ekonomia”. Ida-ne’e haree liubá hafoin pandemia COVID-19 foku ba prioridade komponente ekonómika. Tanba ne’e, Timor-Leste prepara-an daudaun atu konsentra nia esforsu ba diplomasia ekonómika.

“MNEK rasik fó atensaun barak ba kooperasaun ekonomia. Oinsá ita iha kooperasaun rill liu iha área ekonomia,” Ministra Adaljiza subliña tan.

Nia informa, iha simeira ne’e sei diskute kona-bá akordu mobilidade CPLP nian hodi fasilita livre tránzitu ba sidadaun nasaun membru nian ba área edukasaun, serbisu no ekonomia.

Aprova lista Embaixadór-sira

Ministra Adaljiza mós informa katak Prezidente Repúblika aprova tiha ona lista embaixadór Timor-Leste ba Malázia, Tailándia, Vietnam, Burney, Myanmar, Nova Zelándia, Bruxelas, Geneva, Nova Yorke, Jakarta, Maputo no Korea Sul.  Nune’e, Estadu TL sei hein agreement hosi nasaun-sira ne’ebé reprezentante diplomátika sei hala’o nia serbisu no hafoin ne’e sei deside data atu ba maka Prezidente Repúblika fó pose ba embaixadór-sira.

“Prezidente aprova tiha ona. Ami hein hela pedidu agreement país sira ne’ebé atu ba, bainhira país sira aseita ona, maka Prezidente Repúblika sei fó posse ba sira,” Ministra Adaljiza tenik.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here