Pesoál Saúde prepara fó vasina AstraZeneca ba sidadaun iha Sentru Saúde Internamentu Vera Cruz. Imajen TATOLI/Francisco Sony

ATAÚRO 11 juñu 2021 (TATOLI)-Primeiru-Ministru (PM), Taur Matan Ruak, enkoraja populasaun iha postu administrativu Ataúro, munisípiu Dili, atu simu vasina kombate COVID-19 ho doze kompletu, nune’e livre halo sirkulasaun sein halo teste.

“Tenke simu vasina tanba iha objetivu tolu hanesan salva ita-nia vida, normaliza ema-nia vida, no normaliza hikas atividade ekonómika rai-laran,” PM hateten iha seremónia lansamentu inaugarasaun postu Unidade Polísia Marítima (UPM), iha suku Bikeli, Ataúro, sesta ne’e.

Notísia relevante: MS lansa vasina AstraZeneca doze daruak

Xefe Governu dehan, daudaun ne’e povu tomak, nasaun no parseiru sira koopera hamutuk hodi kombate pandemia globál ne’e iha Timór.

Nia nota katak iha nasaun barak ema mate tanba COVID-19 inklui Timór, tanba ne’e Governu halo esforsu atu moras ne’e labele fó impaktu maka’as ba povu nia vida.

“Atu ida-ne’e labele akontese, dalan di’ak mak vasina, tempu badak sei komesa programa vasinasaun, entaun ha’u husu ita boot sira partisipa no labele rona informasaun falsa ne’ebé lansa iha rede sosiál katak vírus ne’e laiha no vasina ladi’ak, maibé ita fiar no koopera ho  médiku sira tanba nasaun tomak nia esforsu dahuluk mak salva ema-nia vida atu labele mate, karik mate tanba distinu labele mate tanba vírus,” PM akresenta.

Entretantu, ema hamutuk 28.412 iha nível nasionál mak simu ona vasina doze dahuluk iha fulan-abríl, kompostu hosi iha Dili hamutuk 15.835 no munisípiu 12.577, ne’ebé dadaun ne’e tama ona faze vasina AstraZeneca ba doze daruak.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here