Ekipa hosi DGHU halo aprosimasaun ho abitante iha área besik tasi ibun, iha área Bebonuk. Imajen/MOP

DILI, 11 juñu 2021 (TATOLI)—Ministériu Obra Públika (MOP) liuhosi Diresaun Jerál Abitasaun no Urbanizmu (DGHU, sigla Portugés) hahú aprosima komunidade sira ne’ebé konstrui uma iha área risku sira, hanesan besik tasi ibun aldeia Metin II, suku Bebonuk, postu Administrativu Don Aleixo, munisípiu Dili.

Objetivu hosi intervensaun ne’e atu koordena ho komunidade no autoridade lokál iha área refere hodi bele kontrola uzu espasu tuir lei no aspeitu tékniku, ne’ebé tama iha área ho proximidade besik liu ho tasi.

“Intervensaun ne’e halo aproximasaun ho komunidade no halo sosializasaun kona-ba konstrusaun iha tasi ibun ne’ebé tama iha kategoria área risku, inklui sensibiliza informasaun ba komunidade ligadu ho akontesementu iha loron 28 maiu, bainhira akontese anin no laloran boot hodi estraga komunidade hela iha área ne’e,” refere nota ne’ebé Agência TATOLI asesu, Sesta ne’e.

Atividade ne’e aliña iha artigu 21 iha Lei Protesaun Sivíl foun númeru 12/2020, loron 02 dezembru, ne’ebé tama ein vigor iha loron 02 janeiru 2021 ne’ebé ko’alia kona-ba utilizasaun ba rai.

Notísia relevante: Lei protesaun sivíl foun, kriminaliza harii uma iha fatin risku

Lei ne’e fó biban ba protesaun sivíl hodi serbisu hamutuk ho instituisaun sira hanesan Diresaun Nasionál Terra no Propriedade (DNTP), Ministériu Planu Ordenamentu (MPO), Sekretaria Estadu Ambiente (SEA), atubele halo medida prevensaun, liu-liu komunidade ne’ebé hela iha fatin risku dezastre nian.

Notísia relevante: Governu klasifika no kualifika solu hosi planu territoriál

Iha maiu 2021, Konsellu Ministru aprova ona projetu Dekretu-Lei ne’ebe estabelese Rejime Jurídiku ba Klasifikasaun no Kualifikasaun Uzu ba Rai, ne’ebé diploma ne’e estabelese parámetru sira ba klasifikasaun no kualifikasaun ba rai ne’ebe definidu ona iha Lei Baze Ordenamentu Territoriál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here