Ministru Finansa, Rui Augusto Gomes. Imajen TATOLI/Egas Cristóvão

DILI, 11 juñu 2021 (TATOLI)–Ministru Finansa, Rui Augostu Gomes, konsidera finansa públika ninia susesu depende ba sistema kontabilidade no relatóriu ne’ebé di’ak, forte no funsionál hodi garante transparánsia, atu permite sidadaun hotu bele hatene loloos administrasaun públika nia atividade no ezekusaun orsamentál.

“Ita-nia governante sira bainhira halo desizaun polítika tenke fundamenta didi’ak, atu sidadaun sira tenke hatene nia rezultadu servisu saida no ba orgaun ne’ebé halo fiskalizasaun no kontrolu bele ezerse sira-nia funsaun ho fásil no di’ak,” Ministru hateten iha sala plenária, Parlamentu Nasionál (PN), sesta ne’e.

Ministru hato’o kestaun ne’e, bainhira fundamenta ba Komisaun C ne’ebé trata asuntu Finansa Públika, kona-ba proposta Lei Enkuadramentu Orsamentál númeru 27/V (3a), ne’ebé atu subtitui Lei Orsamentu no Jestaun Finanseira hodi hadi’ak liútan ezekusaun Orsamentu Jerál Estadu (OJE) no impede prátika dezorsamentasaun.

Tuir governante ne’e, Lei Enkudramentu Orsamentál obriga atu informasaun sira ne’ebé aprezenta ne’e tenke kompletu ho kualidade di’ak, liuliu iha OJE ida tenke inklui informasaun sira hotu inklui tabela sira ka elementu informátika no mós regularidade aprezentasaun relatóriu kona-ba ezekusaun orsamentál.

“Tenke adopta atu mellora prátika kontabilístika, liuhosi klasifikasaun orsamentál foun no planu konta foun tanba ho meiu ne’e mak sei bele prodús informasaun ho kualidade di’ak liután kompara ho país sira seluk,” nia akresenta.

Ekonomista ne’e esplika, Lei Enkudramentu Orsamentál ne’e bainhira hetan aprovasaun iha PN, sei sai pasu importante no dahuluk iha ámbitu reforma jestaun finanseira públika, hodi kompleta ho aprovasaun diploma atu regulamenta hodi permite katak lejislasaun ne’e bele ezekuta.

Ezekutivu ne’e dehan, hafoin aprova lejizlasaun ne’e, presiza adaptasaun ba sistema relasiona ho ezekusaun orsamentál no jestaun finanseira públika, formasaun ba funsionáriu sira no ajente sira ne’ebé envolve ba operasaun no  produsaun manuál ba apoiu.

“Ami fiar katak lei enkudramentu orsamentál ida ne’e sei reforsa Parlamentu nasionál nu’udar orgaun resposavél aprova Orsamentu Jerál Estadu,” nia subliña.

Objetivu dahuluk hamosu lei foun ne’e, atu garante OJE aprezenta reseita no despeza tomak hosi setór públiku administrativa nian, nune’e iha retratu di’ak kona-ba situasaun finanseira públika no bele impede prátika dezorsamentasaun.

Objetivu Daruak, hakarak reforsa liután relasaun entre planeamentu no orsamentu liuhosi orsamentasaun ida bazeia ba programa, ne’ebé ho foku prinsipál tenke iha rezultadu atubele estabelese relasaun direta entre dotasaun orsamentál no atividade sira-ne’ebé prevee iha planu annuál hosi entidade públika sira hotu.

Nune’e mós, buka hadi’a informasaun ne’ebé baibain prodús no garante katak informasaun sira-ne’e bele uza halo komparasaun iha nível internasionál.

Ministru esklarese, atubele dezeña di’ak liután polítika públika, PN, Kámara Konta no Sosiedade Sivíl sira mós bele ezerse funsaun di’ak bainhira halo kontrolu ka fiskalizasaun.

Aleinde ne’e, lejizlasaun tenke sai elementu fasilitadór jesatun finanseira no la’ós atu sai fali obstákulu ba dezenvolvimentu funsaun Estadu nian.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here