Sede suku Atudara, postu administrativu Cailaco, munisípiu Bobonaro ne’ebé Governu reabilita. Imajen Tatoli/ Sérgio da Cruz.

BOBONARO, 11 juñu 2021 (TATOLI)—Governu liu hosi Ministériu Administrasaun Estatál (MAE), reprezenta hosi Diretór Jerál Dezenvolvimentu Rurál, Rosito Guterres, inaugura reabilitasaun sede suku Atudara, postu administrativu Cailaco, munisípiu Bobonaro.

Fundu ba reabilitasaun sede suku ne’e mai hosi  Orsamentu Jerál Estadu (OJE) 2019 ho montante $12.431,93, hodi troka kalén, troka baza, troka plafón, arus, oda-matan ho janela inklui azulezu.

Notísia relevante:OJE 2021, Bobonaro ezekuta ona 27.65%

Rosito Guterres, hateten Governu iha ona polítika ne’ebé sei fó osan insentivu ba suku no tau ekipamentu iha suku-sira, nune’e bele halo atendimentu ba komunidade.

“Ita inaugura ona sede suku ida-ne’e, no la’ós para iha ne’e de’it tanba programa ne’e tinan-tinan sei kontinua implementa iha suku-sira seluk. Governu mós sei kontinua tau fasilidade hanesan komputadór, impresora, atu halo serbisu hodi atende komunidade sira,” nia hateten.

Prezidente Autoridade Munisipiu Bobonaro, Jeferino Sares de Jesus, husu ba autoridade lokál no komunidade atu uza ho kuidadu, no hein katak programa ne’e sei realiza to’o suku seluk iha munisípiu ne’e.

Nune’e mós Xefe Suku Atudara, Manuel Ximenes, agradese ba Governu ne’ebé reabilita ona sede suku ne’e, maibé husu nafatin Governu atu apoiu nafatin komunidade.

Reabilitasaun ba sede suku ne’e re-dezena fila-fali modelu ne’ebé tékniku Programa Nasionál Dezenvolvimentu  Suku (PND) halo, kompleta ho prototipu no elementu asesibilidade ba ema ho defisiánsia hosi programa fundu rezilénsia ne’ebe implementa iha tinan 2021.

Suku Atudara iha aldeia haat hanesan Atubuti, Tuturema, Noapu no Bia-tehu, ho totál abitante 2.011 no xefe família 452.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here