Benefisiáriu iha sede Suku Bairru-Pité, simu hela subsídiu $200 hosi Governu, relasiona ho Estadu Emerjénsia durante fulan rua hela iha uma, tanba COVID-19, Dili, (16/06/20). Imajen Tatoli/António Gonçalves.

DILI, 11 juñu 2021 (TATOLI)—Funsionáriu públiku na’in-rua ne’ebé ho saláriu liu $500, aprezenta an ona liu hosi kontaktu diretamente ba Ministériu Solidariedade Sosiál no Inkluzaun (MSSI), atu devolve subsídiu agregadu familiár $200, tanba la prienxe kritéria.

Adjuntu Komisáriu Komisaun Anti korrupsaun (CAC sígla portugés) ba Asuntu Prevensaun no Sensibilizasaun, Luís Oliveira Sampaio, hateten funsionáriu na’in-rua ne’e kontaktu direta ba autoridade tanba konsiente katak, la prienxe duni kritéria atu hetan subsídiu ne’e.

Notísia relevante:CAC fó ultimatum ba benefisiáriu ne’ebé seidauk devolve subsídiu $200

“Ho informasaun ne’ebe ita fó-sai, iha funsionariu na’in-rua, ida hosi Sekretária Estadu Kooperativa (SEKOP) no  ida seluk hosi serbisu Administrasaun munisípiu  Viqueque ne’ebé kontaktu  ba MSSI tanba  la elijível no hakarak entrega hikas ba Governu,” Luis Oliveira Sampaio, hateten ba jornalista Agência Tatoli iha knaar fatin Praia dos Coqueiros, Dili, sesta ne’e.

MSSI hamutuk CAC koordena ona ho Banku Nasionál Komérsiu Timor-Leste (BNCTL sígla portugés), atu fasilita benefisiáriu la elijível bele entrega direta ba Banku ne’e.

Tanba ne’e, sukrusál BNCTL iha Dili no munisípiu disponível atu bele atende benefisiáriu-sira ne’ebé ho voluntáriu hakarak fo fila subsídiu ne’ebé simu ona.

Tuir planu, semana oina, MSSI, CAC ho BNCTL sei hala’o enkontru, hodi partilla informasaun atu hatene númeru benefisiáriu hira mak konsege entrega ona osan.

Parte CAC apela nafatin ba benefisiáriu ka funsionáriu ne’ebé ho saláriu liu $500 ne’ebé la eliijível ba subsídiu ne’e maibé konsege simu, atu ho konsiénsia devolve.

MSSI ho koordenasaun CAC hasai ona karta sirkular to’o fulan juñu atu benefisiáriu ne’ebé la elijível, simu ona subsídiu atu devolve.

Bainhira la koopera ho prazu ne’ebé fó-sai ona, CAC sei foti medida repressivu ka investigasaun, atu submete ba regra prosesuál ne’ebé vigora.

Iha 05 agostu 2020, ekipa konjunta kompostu hosi CAC, Provedoria Direitu Umanu no Justisa (PDHJ sígla portugés), Inspesaun Jerál Estadu (IJE) no Komisaun Funsaun Públika (CFP sígla portugés), fó-sai rezultadu monitorizasaun, katak, benefisiáriu hamutuk 148 ne’ebé ho saláriu liu $500, simu subsídiu $200 ho totál osan hamutuk $29.600, no tenke devolve ba Governu.

Subsídiu ne’e tenke devolve tanba la prienxe kritéria, tuir dekretu lei apoiu monetáriu ba agregadu familiár, tuir lei númeru 15/2020 ka nu’udár funsionáriu ne’ebé ho saláriu liu $500.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here