Hare iha Atabae. Imajen TATOLI/António Gonçalves

DILI, 11 juñu 2021 (TATOLI)–Prezidente Sentru Lojíztika Nasionál (CLN, sigla portugés), Agusto Junior Trindade, informa, iha tempu badak sei sosa hare kulit hosi grupu agrikultór sira iha munisípiu, nune’e bele reforsa stock iha armazen nasionál no munisípiu sira.

“Ita sei sosa tonelada 4.300 iha territóriu laran tomak, ne’ebé daudaun iha ona faze preparasaun no diretór CLN sira iha ona terrenu atu halo preparasaun, sensibilizasaun no koordena ho staff sira iha munisípiu hodi prepara armazen no lojízka,” Prezidente CLN hateten ba Agência TATOLI, via telefónika, sesta ne’e.

Tuir Dirijente ne’e, CLN sei hahú sosa iha postu administrativu Maliana, munisípiu Bobonaro.  

“Planu sosa produtu lokál ne’e, ita hahú halo ona no haree kabimentu orsamentu no hetan ona aseitasaun hosi Ministéri Finasa, nune’e iha loron 24 juñu ita sei halo lansamentu sosa hare kulit iha Maliana,” nia akresenta.

Entretantu, iha orsamentu ratifikativu 2021 ne’ebé Prezidente Repúblika promulga ona, prevee millaun $12 resin ba CLN hodi sosa produtu lokál.

Iha maiu nia laran ne’e, Ministériu Agrikultura no Peska (MAP) lansa époka dahuluk kolleta hare ektare 75 iha aldeia Helesu, suku atabae, postu administrativu Atabae, munisípiu Bobonaro.

Antes ne’e, iha agostu 2020, Governu liuhosi CLN halo akizisaun foos hosi Vietname ho kuantidade tonelada 30.000 ho kustu millaun $15, tanba iha situasaun emerjénsia ne’ebé kuaze nasaun hotu aplika serka sanitária no demanda konsumu nasionál a’as, maibé daudaun ne’e stock iha armazen kontinua menus tanba intervensaun merkadu no apoia umanitária.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here