Administradór Postu Administrativu Metinaro, Munisípiu Dili, Fausto Soares Dias, simu vasina AstraZeneca doze dahuluk iha Administrasaun Postu Metinaro. Imajen/Espesiál

DILI, 11 juñu 2021 (TATOLI)-Administradór Postu Administrativu Metinaro, Munisípiu Dili, Fausto Soares Dias informa, dezde maiu to’o  kinta  (10/06), abitante hamutuk 1.293 iha Postu Administrativu Metinaro, Dili, simu ona vasina AstraZeneca.

Notísia Relevante : Liña frente 61 iha Metinaro simu vasina AstraZeneca

“Bazeia ba fixa família 2020 totál populasaun Metinaro hamutuk 7.654, hosi númeru ne’e, dezde maiu to’o horiseik, abitante-sira 1.293 mak simu ona vasina AstraZeneca maibé ida ne’e la konta hotu ba ekipa liña frente hamutuk na’in-612 ne’ebé antes ne’e simu ona vasina AstraZeneca doze dahuluk nian,”  Fausto Soares Dias, informa ba Agência Tatoli liuhosi telefónika, sesta ne’e.

Nia hatutan, ba ekipa liña frente ne’ebé antes ne’e simu ona vasina AstraZeneca doze dahuluk nian, hahú loron 11-22 juñu, simu kompleta (doze daruak) vasina AstraZeneca.

Nia afirma, partisipasaun komunidade Metinaro nian másimu simu vasina AstraZeneca tanba atu dehan de’it katak nu’udár Autoridade lokál Postu Administrativu Metinaro hetan orientasaun matan dalan hosi nasionál Ministériu Administrasaun Estatál (MAE) ne’ebé tun mai lidera hosi Prezidente Autoridade tun mai Administradór Postu-sira to’o Xefe Suku no Xefe Aldeia-sira hola parte hotu ba ekipa mobilizasaun task force COVID-19 nian.

Nia dehan, objetivu hosi ekipa mobilizasaun ne’e kada Postu Administrativu hahú hosi Administradór to’o Xefe Aldeia-sira tenke mobiliza komunidade iha kada bairru no aldeai fó informasaun ne’ebé kredivel relasiona vasina AstraZeneca hodi kombate informasaun falsu ne’ebé espalla iha mídia sosiál Facebook.

Nia afirma, antes ne’e komunidade barak mak ta’uk simu vasina AstraZeneca, maibé hafoin ekipa task force sira mobiliza no halo sensibilizasaun loroloron tama-sai bairru-sira iha Metinaro, ikus mai komunidade voluntáriamente simu vasina AstraZeneca.

“Ami garante programa sosializasaun no sensibilizasaun vasina AstraZeneca ba komunidade Metinaro sei susesu iha ami-nia postu. Ha’u garante katak la 100% maibé 90 % komunidade sei partisipa,” nia hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here