Pesoál saúde fó vasina ba abitante, iha sentru saúde iha Dili. Imajen TATOLI/António Gonçalves

BAUCAU, 10 juñu 2021 (TATOLI)–Diretór Servisu Saúde Munisipál Baucau (SSMB), Domingos Reinaldo da Costa Guterres, hateten, daudaun ne’e pesoál saúde, akompanã hosi autoridade suku kontinua tama-sai uma hodi halo sosializasaun ba komunidade sira relasiona ho kampaña vasina iha Baucau.

“Sosializasaun mak agora la’o hela tama to’o suku no aldeia sira. Pesoál saúde sira agora kontinua la’o iha postu admistrativu ida-idak no to’o iha sira-nia suku,” Diretór ne’e hateten iha ninia knaar fatin, Ria-mare Bahu, Baucau kinta ne’e.

Notísia relevante: 14 juñu, hahú vasina AstraZeneca doze daruak iha Baucau

Domingos esplika, liña koordenasaun dahuluk iha postu admistrativu neen, depois koordena ho xefi suku no aldeia hodi akonpanã voluntáriu no pesoal saúde sira halo sosializasaun ba aldeia idaidak inklui foti dadus.

Objetivu mak atu fó motivasaun ba komunidade kona-ba meiu prevensaun COVID-19 liuhosi vasina, nune’e daudaun iha programa hafoin sosializasaun iha aldeia no suku sira, halo mós door to door, katak pesoal saúde na’in-ida akonpanã ho Xefe aldeia ho delegadu, tama-sai uma atu fahe informasaun.

“Pelumenus molok atu tama bá aldeia sira ne’e, fó vasinasaun ba ema hirak ne’ebé iha ona koñesementu, atu nune’e iha tena vontade atu hetan vasina,” nia akresenta.

Daudaun ne’e provizóriumente, tuir dadus hosi Saúde Munisipál ne’ebé rekolla iha Baucau, ema hamutuk 21.000 mak tama kategoria komorbidade no idozu.

Entertantu, vasina iha Baucau faze dahuluk implenta ona ba ekipa liña frente hamutuk 2.018 iha loron 12 abríl 2021 no tuir oráriu doze daruak sei hahú lansa iha segunda (14/06).

Jornalista: Natalino Belo

Editora: Julia Chatarina

HAKEREK NO HATÁN

Please enter your comment!
Please enter your name here