Vasina AstraZeneca. Imajen Tatoli/Francisco Sony

DILI, 10 juñu 2021 (TATOLI)—Vise-Koordenadora Forsa-Tarefa ba Prevensaun no Metigasaun Sala Situasaun, Sentru Integradu Jestaun Krize (CIGC, sigla portugés), Odete da Silva Viegas, hateten, hafoin sidadaun ida vasina kompleta (doze daruak) tenke hein kompleta semana ualu maka foin livre halo movimentu.

Períodu entre vasina doze dahuluk ba daruak semana neen, tanba ne’e presiza hein tan semana rua hodi kompleta semana ualu.

“Hafoin vasina segunda doze, semana ualu mak ita bele halo mobilizasaun bá munisípiu tanba vasina ne’e sei funsiona hafoin semana ualu iha ita-nia isin. Tanba ne’e, hafoin vasina ne’e kompleta ona iha ita-nia isin, liu tiha semana rua mak bele halo viajen,” Vise-Koordenadora CIGC, hateten, iha Sentru Konvensaun Dili (CCD, sigla portugés), kinta ne’e.

Notísia relevante: Sidadaun 87.230 simu ona AstraZeneca doze dahuluk, MS kampaña doze daruak

Ema hamutuk 28.412 iha nível nasionál mak simu ona vasina doze dahuluk iha fulan-abríl, kompostu hosi iha Dili hamutuk 15.835 no munisípiu 12.577.

“Hosi totál 28.412 ne’e mak vasina ba doze daruak, ne’ebé mak hahú ona iha kinta (10/06) no iha munisípiu sei hahú iha loron 14 juñu,” nia akresenta.

Tempu ba vasina doze daruak ne’e hahú iha loron 10 to’o 30 juñu 2021.

“Iha doze daruak ne’e bele akontese vasina ba ema ladun barak tanba tuir ema idaidak ninia kartaun,” nia hatutan.

Fatin ne’ebé sei realiza vasina doze daruak nian mak iha CCD, klínika Fatumeta, Hospital Nacional Guido Valadares (HNGV), Sentru Saúde Formosa, no Servisu Saúde Munisipál (SSM).

Jornalista: Antónia Gusmão.

Editora: Julia Chatarina

HAKEREK NO HATÁN

Please enter your comment!
Please enter your name here