Komandante Jerál PNTL Komisáriu Faustino da Costa kontinénsia ba Primeiru-Ministru, Taur Matan Ruak ho Vise Ministru Interiór, António Armindo. Imajen/Eugénio Pereira

DILI, 10 juñu 2021 (TATOLI)— Vise-Ministru Interiór, António Armindo, hateten Primeiru Ministru (PM), Taur Matan Ruak, hanesan mós Ministru Interiór (MI) mak iha kompeténsia atu halo reforma ba estrutura Komandu Polísia Nasionál Timor-Leste (PNTL).

António Armindo ko’alia asuntu ne’e, hodi responde ba preokupasaun públiku, liuliu sosiedade sivíl ne’ebé rekomenda atu halo re-estruturasaun iha instituisaun PNTL, liga ho kazu membru polísia MJ uza arma hodi tiru-mate Mateus de Deus ho Camilo de Deus inklui hakanek vítima ida-seluk iha aldeia Ainitas-hun, suku Lahane Osidentál, munisípiu Dili, sábadu (05/06).

Notísia relevante:PDHJ husu PNTL kumpre regra utilizasaun arma

“Ita mós hanoin hela ida-ne’e tanba importante tebes. Maibé desizaun hotu-hotu kabe ba Ministru Interiór. Ha’u laiha kompeténsia atu halo reestruturasaun no úniku Komandu Jerál husu aprovasaun hosi  MI mak tenke deside,” António Armindo, hateten ba jornalista-sira iha edifísiu Ministériu Finansa, Aitarak-Laran, kinta ne’e.

Governante ne’e enkontru ona ho Komandante Jerál PNTL, Komisáriu Polísia, Faustino da Costa, hodi esplika regulamentu disiplinár PNTL ne’ebé deklara klaru katak, kualkér membru polísia fora hosi oras serbisu, labele lori arma ba uma.

“Responsável másima PNTL mós sempre alerta bebeik ba membru-sira kona-bá mekanizmu uza arma. Maibé ita husu nafatin atu kada komandante tenke kontrola di’ak liután liuliu mekanizmu uza arma no laiha ema ida mak lori arma ba uma,” nia subliña.

Antes ne’e Komandu Jerál PNTL halo ona enkontru ho membru Konsellu Superiór PNTL, hodi halo avaliasaun jerál liga ho kazu Lahane.

Durante ne’e, Komandu PNTL hetan apoiu hosi parseiru TLPDP hodi fó formasaun karáter ba utilizasaun arma ho kuidadu no ho responsabilidade, hodi evita problema.

Antes ne’e Provedoria Direitu Umanu no Justisa (PDHJ sígla portugés), husu ba Komandu Jerál PNTL, atu kumpre regra utilizasaun arma, tuir despaixu nº 290/CG-PNTL/IX/2016 pontu b, proibidu ka labele lori ka utiliza arma bainhira la hala’o serbisu polísia-nian, iha tempu folga, feriadu, lisensa saida de’it, tuir kursu, moras, partu etc, no pontu f kona-bá dezlokasaun serbisu bele utiliza arma bainhira iha órden serbisu, ne’ebé klaru hosi nia-Komandante ho asuntu serbisu polísia-nian.

Alende ne’e, PDHJ  liu hosi provedora Jesuina Maria Maria Ferreira Gomes, rekomenda ba Governu atu halo reforma ba instituisaun PNTL, nune’e bele serbí di’ak liu tán povu.

Notísia relevante:ORHF husu Governu reforma PNTL

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here